لەوەر وەفر...پەروەردەی سلێمانی ری دەێد وە وەڕێوەبەرایەتیەگانی بکەێدە پشوو هاتوچویش هووشداری لە یەخداین جادەیل دەێد

وەڕێوەبەرایەتیەگە ئمڕوو لە بەیاننامەیگ وت، "لە گوزەشتەیش دەسڵات داسە وەڕێوەبەرایەتیەل پەروەردە و سەرۆک یەکەیل ئیداری وەڕێوەبەرایەتیەیل بتوەنن بکەنێ پشووی فەرمی ئەرا بیوەیی خوەنەوار و مامووسا و فەرمانبەرەیل  وە مدوو وای تون و وەفر وارین".

وەڕێوەبەرایەتی هاتوچو سلێمانیش، ئمڕوو راگەیان، ئەرا پاراستن سەلامەتی هاوڵاتیەیل و رانندەیل لە مەترسی ئێ شەپۆل وەفر و وای تونە کە بوودە مدوو بەسین ریگە و بانەیل وە تایبەت ناوشار، دووپاتکرد تونێلەگە وە شیوەی وەختانە بەسێد لەوەر وەفر وارین و سایەقە.

هاتوچو سلێمانی لە بەیاننامەگەی داواکەێد لە هاوڵاتی و رانندەیل وە وریاییەو ریگەوبانەیل وەکار بارن وە تایبەت جادەی بازنەیی "مەلیک مەحمود"  لە وەردەم هۆتیل تایتانک، مەزەنەکرێد پلەی گەرمی لەدویای شەو داوەزێد و فرەیگ لە جادەیل یەخ بنەێد.