لە لەندەن.. نێچیروان بارزانی چەوی کەفتە سەرۆک ئەنجومەن لۆردەیل بەریتانیا

شەفەق نیوز/ سەرۆک هەرێم کوردستان لەناو لەندەن پایتەخت بەریتانیا، ئمڕوو پەنجشەممە،  وەگەرد جۆن ماکفول سەرۆک ئەنجومەن لۆردەیل لە پەرلەمان بەریتانیا، باس کار سیاسی و هەڵبژاردن هاتگ عراق،  و دۊیاترین گەشەی عراق و هەرێم کوردستان و وەردەوامی پاڵپشتیکردن بەریتانیا ئەرایان کرد.

سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دۊیەم رووژ سەردانە فەرمیەگەی ئەرا بەریتانیا، نئچیروان بارزانی سەرۆک هەرێم کوردستان،  چەوی کەفتە لۆرد جۆن ماکفول سەرۆک ئەنجومەن لۆردەیل لە پەرلەمان بەریتانیا.

وتیش؛ هەردوگ لایەنەگە باس دۊیاترین گەشەی عراق و ناوچەگە،  و کار سیاسی لە عراق و هەرێم کوردستان،  و هەڵبژاردن هاتگ،  وپەیوەندیەیل ناوبەین عراق و هەرێم کوردستان وەگەرد بەریتانیا،  و جەنگ دژوە داعش،  و پەتای کۆڕۆنا،  و ڕەوش ئاوارەیلە لە هەرێم کوردستان،  و کاریگەری ئاڵشتبۊی کەشوهەواگە لەبان عراق و هەرێم کوردستان،  و بڕێ لە باوەتەیل گرنگ لەلای هەردوگ لایەنەگە کریا، و ڕای خوەیان دەربارەیان باس کردن.

لۆرد ماکفول باس لە دەسخوەشی خوەی کرد لە کار دیموکراتی لە هەرێم کوردستان و کۆتای مسۆگەرکردن بەشداری ژن و نۆینەرەیل پێکهاتەیلە لە کار سیاسی و ژیان پەرلەمانی و دامەزراوەیل حکومەتی،  و جەخت کرد ک پەرلەمان بەریتانیا ئەوەسا وەردەوام بوود لە پشتگیریکردن هەرێم کوردستان،  و ئەراوە پێشنیار و تەمەیلی خەێدە وەردەس حکومەت وڵاتەگەی، و هەمیش سوپاس لە دەور هەرێم کوردستان کرد ئەرا نواگردن تیرۆر و شکستهاوردن وە داعش.

لەلای خوەییش بارزانی باس سوپاس و رێز هەرێم کوردستان ئەرا وەردەوامی پاڵپشتیکردن پەرلەمان بەریتانیا و ئەنجومەن لۆردەیل و حکومەت بەریتانیا ئەرا عراق و هەرێم کوردستان کرد.

هەمیش سوپاس لە پەرلەمان بەریتانیا کرد ک تاوانەیل داعش لەبان ئەیزیدیەیلە و ئەو پێکاتەیلەی عراق و هەرێم کوردستان وە تاوان جینۆساید ناسان، و داوا لە پەرلەمان بەریتانیا کرد هاوکاری وەگەرد هەرێم کوردستان بکەێد لە بتەوکردن دیموکراتی و دامەزراوەیل ولاتەگە.