لە ژیروەژیر.. لایەنەیلیگ ریگری لە هاتنەوەی حزبە کوردیەگان ئەرا دیالە کەن
شەفەق نیوز/ وەرپرسەیل و سەرکردەیلیگ کورد لە دیالە، ئمڕوو پەنجشەممە، دووپاتکردن لە چووڵبوین ٦ کەرت لە دابڕیایەگان لە بارەگایل حزبە کوردەگان، و کۆچبردن وئاوارەیی ٧٥ لەسەد لە ئەندامەیلیان وەرەو دەیشت ئەرا هووکارەیل جوورا جوریگ، لە وەختیگ ک سەرچەوەیگ خۆجێیی ئاشکراکرد ک لایەنەیلیگ سیاسی ( ناویان نەهاورد) ریگریکەن لە هاتنەوەی حزبە کوردەگان ئەرا ئەو ناوچەیلە.
ئەو کەرتەیلە ک ئەو وەپرسەیلیە باسیان کردن خوەیان سەعدیە وجەلەولا و قەرەتەپە و قەزانیە و مەنەلی و جەبارە ن لە پارێزگای دیالە.
شاکر مەندەلاوی ئەندام یەکێتی نیشتمانی کوردستان لە مەنەلی ئەرا ئاژانس شەفەق نیوز وت: ناحیەکە چووڵە لە هەر بارەگایگ ئەرا پارت دیموکرات کوردستان یا یەکێتی نیشتمانی کوردستان، و دیاریکرد ک ئەندامەیل نیشتمانی کوردستان هانە ئەولا وەبی هیچ چالاکییگ.
مەندەلاوی ئاماژەکرد لە داواکاری و تەقەلا ئەرا تەرخانکردن زەوییگ ئەرا نیشتمانی کوردستان لە مەنەلی، بەڵکم هیچ وەدەس نەهات لەوەر ئەو ریگریە لەنوای حزبە کوردەگان لە مەنەلی.
لە ناحیەی جەلەولا، جەلال وریا ئەندام یەکێتی نیشتمانی کوردستان دووپاتکرد لە چووڵی جەلەولا لە بارەگایل حزبە کوردەگان، لەوەخت دەرچگن داعش لە ساڵ ٢٠١٤ و ریفراندۆم سەروەخوەیی کوردستان لە ساڵ ٢٠١٧ تا ئیسە.
وریا ئاماژەکرد وە کۆچبردن ٧٥ لەسەد لە سەرکردەیل یەکێتی و گشت ئەندامەیل پارتی وەرەو خانەقین وناوچەیل هەرێم لەماوەی ساڵەیل ناوبەین ٢٠١٤-٢٠١٧ لەوەر تەقانن ماڵەیلیان یا ئامانجکردنیان لەلایەن کۆمەڵە تیرۆرستەگان، ئیجا رووداوەیل ریفراندۆم کوردستان لە ساڵ ٢٠١٧.
چووڵبوین ناوچە دابڕیایەگان لە حزبە کوردەگان رەسیە ناحیەی قەرەتەپە، ک سەرچەوەیگ خۆجێیی ک لەوەر دسپیچگەیل تایبەت نەخوازێد ناوی خوەی بڵاو بکەێد، ئاشکرای رەتکردن لایەنەیلیگ سیاسی کرد لە هاتنەوەی بارەگایل حزبە کوردەگان ئەرا ناحیەکە.
سەرچەوەگە ئەرا ئاژانس شەفەق نیوز ئاشکراکرد ک پارتی و یەکێتی داواکاریەیل فەرمی خستنەسە وەردەس ئیدارەی پارێزگای دیالە ئەرا دووارە کردنەوەی بارەگایلیان، بەڵکم کارەگە رەتکردن لە لایەنەیلیگ سیاسی وەخوەی دی، ک نەخوازێد ناویان ئاشکرا بکەێد.
