لە دوو رووژ یەکەمی جەژن زیاتر لە ٥٠ هەزار گەشتیار سەردان شار سلێمانی کردنە
وەڕێوەبەرایەتیەگە لە بەیاننامەیگ رەسیە ئاژانس شەفەق نیوز وت: “وەگورەی دویاترین ئامار کە لە ری بازگەیل و دەروازە سنوورییەیل و فڕۆکەخانەیل توومار کریانە، نزیکەی 50 هەزار گەشتیار عراقی و ئیرانی و بیانی سەردان پارێزگای سلێمانی کردنە، لە دوو رووژ یەکەم جەژن، ئەرا وەسەربردن پشوو جەژن”.
لە بەیاننامەگە وتیش: "وەگەرد هاتن شمارەیگ فرەی گەشتیار ئەرا پارێزگاگە، نەکفتنەسە هویچ گیچەڵیگ کە پەیوەندی وە ناوچەیل نیشتەجیبوینیان بیاشتوود".
ئاژانس شەفەق نیوز ڕاپرسیی ئەرا ڕای ئەو گەشتیارەیلە کرد کە گردەوبوین ئەرا قسەکردن لە کەش و هەوای سلێمانی ئەڕا چە لە جەژن و بوونەیل چنە ئەورا؟
ئەحمەد حسێن، هاووڵاتییگ خەڵک بەغداد پایتەخت، ئەرا پەیامنێر ئاژانسی شەفەق نیوز وت: نزمیی پلەی گەرما وە بەراورد وە پارێزگایل ناوڕاس و باشوور، دیمەنە سروشتییەیل و فرەیی چالاکییە گەشتیارییەیل، شار سلێمانی کەێدە شوینیگ گونجیای ئەرا گەشتیاری.
وتیش: چالاکییە گەشتیارییەیل جیاوازن لە ناوەین سەردانیکردن هاوینەهەواری، جویر (ئەحمەد ئاوا، چەمی ڕیزان، بۆکەند، و سەرسەنگ) و بڕیگ ترەک، و لەناوەین ئاهەنگەیل مەلەوانگە، کەمپکردن، ئەسپسواری، و گەشتەیل سەفاری.
حسێن دووپات کرد کە چشتە جیاوازەیل گەشتوگوزاری سلێمانی جوگرافیا و تۆپۆگرافی و دووڵ و لێوار و ئاو شیرین و سامانە سروشتیەیل ترە، یەیش هیلێد بوودە شوین خوازیاگ ئەرا گەشتیارەیل و سەردانکەرەیل لە گشت شوینیگەو و لە هەر وەرزیگ ساڵ، بایەسە ئەوە بویشیەێد کە گەشتیاری و پشوو تاوسانی لە جەهان گرنگترین کەرتەیل ئەرا ئەو وڵاتەیلە دروس کەن کە هویچ وڵاتیگ لە جەهان سەرچەوەی ئابووری یا سامان هەمیشەیی نەیرێد، جویر نەفت و توخمەیل گەشەکردن ترەک.
ئەو گەشتیارە لە قسەیلی وتیش: کەشوهەوای شار سلێمانی لە گەشتیاری هەمەچەشنە، لەوانە گەشتوگوزاری وەرزشی، وەخت وەسەربردن، گەشتوگوزاری چارەسەری، گەشتوگوزاری ئایینی، و جویرەیل ترەک گەشتوگوزار کە هیلێد لە فرە لە گەشتیارەیل چەن گلەیگ سەردان بکەن.
شەدهان مەجید گەشتیار لە دیالە ئەرا ئاژانس شەفەق نیوز باس ئەزمون گەشتوگوزاری خوەی لە سلێمانی کرد کە لە ماوەی سێ ساڵ گوزەشتە دووارەی کەێد و وتیش، “رەنگینی سروشت، پلەی گەرمی مامناوەند، ڕێکخستن کارگێڕی، پابەندبوین وە یاسا، ئاسایش و بیوەیی کە شارەگە تام خوەی دیرێد، بیجگە لەو نرخەیل هەرزانە ئەرا کاروانەیل، کە نرخەگەی لە ١٠٠ هەزار رەد نیەکەێد” لە کۆمپانیا گەشتیارییەیل ئەرا یەک کەس، هیلێد واز لە تەکبیر چگن ئەرا وڵاتەیل ترەک جویر تورکیا یا لوبنان.
مەجید وتیش: رەفتار پولیس هاتووچو و هیزە ئەمنییەیل لەبان ریەیل شارەگە دڵخوەشم کرد، کە کادیرەیلیان پیشوازی لە گەشتیارەیل کەن، جاروباریش ئاسانکاری کەن یا ئاسانکاری بۆ پرۆسەی رەدبوین، بەشیگیان شیرینی پیشکەش کەن لە دەروازەیل ناو شار ، وە فەرمانبەر هەس کە جویر بەڵەیدەر گەشتیاری وە گەشتیارەیل پیشکەش کەن.
پسپۆڕەیل ئەرا پەیامنێر ئاژانس شەفەق نیوز دووپات کەن کە گەشتوگوزار لە فرەی وڵاتەیل جەهان سەرچەوەیگ ئابووری گرنگە کە لە سەرچەوە نەفتیەیل و داهات و گرنگییەگەی کەمتر گرنگ نییە، سلێمانیش یەکیگە لەو شارە گەشتیارەیلە چەودیاریکردن و پاڵپشتییگ فرە خوازێد تا بتوەنێد ئاست گەشتوگوزاری بەرزەو بکەێد.
لەماوەی گوزەشتە کە وەرجە رویداوەیل ساڵ 2014، سلێمانی بووژانەوەیگ گەورە وەخوەی دی لەڕوی تەواوکردن پڕۆژە گەشتیارییە جویراجویرەیل کە لەلایەن کەرت تایبەتەو جیوەجی کریان، ئەرا هاوردن گەشتیار و سەردانکەرەیل ئەرا شارەگە، هەرچەن خوازیاگە ئەوە زیاتر بوود.
