كوردستان وه زنجيره بڕياره‌يليگ ريگرى له كۆرۆنا ئه‌كا
شه‌فه‌ق نيوز/ ليژنه‌ى باڵاى وه‌زارى ئه‌را روێ وه‌ڕوێ بوينه‌وه‌ى ڤايرۆس كۆرۆنا له هه‌رێم كوردستان، له دانيشتن ئمڕووى، شماره‌يگ بڕيار ئه‌را نواگيرى له بڵاوبوينه‌وه‌ى ڤايرۆسه‌گه ده‌ركرد ك له‌ى رووژه‌يل دوياخره زيايبوين وه‌خوه‌يه‌و دێ.
ليژنه‌گه له به‌ياننامه‌يگ ئه‌را ئاژانس شه‌فه‌ق نيوز ئه‌وه ده‌رخست ك دانيشتنيگ وه سه‌رۆپه‌رشتى مه‌سرور بارزانى سه‌رۆك حكومه‌ت ساز كردگه له‌ڕێ ڤيديۆ كۆنفرانس وه ئاماده‌بوين قوباد تاڵه‌بانى جيگر سه‌رۆك حكومه و وه‌زيره‌يل په‌يوه‌نديدار له‌وه‌ر تاوتوێكردن دويايين بارودوخ بڵاوبوينه‌وه‌ى ڤايرۆس كۆرۆنا له هه‌رێم.
له‌سه‌ره‌تاى دانيشنه‌گه وه‌زير ناوخوه‌يى راپۆرتيگ له‌ى باوه‌ته‌و پيشكه‌ش كرد و دوياى ئه‌ويش وه‌زير ته‌ندروستى راپۆرتيگ له‌باره‌ى بڵاوبوينه‌وه‌ى ڤايرۆسه‌گه و به‌رزه‌وبوين شماره‌ى تويشبوين و قوربانيه‌يل پيشكه‌ش كرد و دوياخريش ليژنه‌ى ناوبرياێ شماره‌يگ بڕيار دا، له‌وانه‌يش:
1- وه‌رده‌وامى له جيوه‌جيكردن رێ وشوونه‌يل خواست و كه‌ره‌نتين و پيشكه‌شكردن خزمه‌تگوزارى ته‌ندروستى و چه‌وديرى پزيشكى ئه‌را تويشبويه‌يل و وه‌ركه‌فته‌يل و گه‌شياره‌يل وه‌ل فراوانكردن هه‌ڵمه‌ت هوشياركردنه‌وه‌ى ته‌ندروستى و چه‌وديريكردن هاوولاتيه‌يل له جيوه‌جيكردن رينمايه‌يل.
2- وه‌كارهاوردن ماسك وه‌شيوه‌يگ ئجبارى له‌گشت ده‌زگايه‌يل حكومى و شوونه‌يل گشتى و له‌وه‌رگرتن رێ وشوون دژ سه‌رپيچكاره‌يل.
3- ته‌رخانكردن په‌نج مليار دينار ئه‌را وه‌زاره‌ت ته‌ندروستى له بودجه له‌وه‌ر روێ وه‌ڕوێ بوينه‌وه‌ى ڤايرۆس كۆرۆنا وه‌ئامانج دابه‌شكردنى له‌بان ده‌زگايه‌يل ته‌ندروستى له پاريزگايه‌يل و يه‌كه‌يل ئدارى.
4- راسپاردن وه‌زاره‌ت ته‌ندروستى و لايه‌نه‌يل په‌يوه‌نديدار له‌وه‌ر پيشكه‌شكردن ئاسانكارى خواست ئه‌را كارخانه‌يل دروسكردن ماسك و هه‌وه‌جه‌يل تر خوه‌يپاريزى.
5- وه‌پيداين ده‌سڵات زياتر وه وه‌زاره‌ت ته‌ندروستى ئه‌را فراوانكردن خزمه‌ته‌يل تاقيگايى و داناين ميكانيزم تازه و گونجياێ ئه‌را دياريكردن تويشبويه‌يل وه ڤايرۆسه‌گه.
6- بايه‌سه له‌بان هه‌ردوگ وه‌زاره‌ت ته‌ندروستى و ناوخوه‌يى و ده‌زگاى په‌يوه‌نديه‌يل خارجى په‌ويه‌ندى وه‌ل لايه‌نه‌يل تايبه‌تمه‌ند له حكومه‌ت عراقى و نويسينگه‌ى ريكخرياگ ته‌ندروستى جه‌هانى له عراق و هه‌رێم كوردستان و باڵيۆزخانه‌و كونوسڵخانه‌و نێرده‌يل دبلۆماسى و نوێنه‌رايه‌تيه‌يل و ريكخرياگه‌يل ناوده‌وڵه‌تى داشتوون له‌وه‌ر هه‌ماهه‌نگى و هاوكارى وه‌خاتر پشتگيرى هه‌وڵه‌يل هه‌رێم كوردستان له روێ وه‌ڕوێ بوينه‌وه‌ى ڤايرۆسه‌گه.
7- وه‌ردامبوين قه‌يه‌غه‌ى هاتوچوو له‌ناونى پاريزگايه‌يل و يه‌كه‌يل ئدارى و وتونكردنه‌وه‌ى رێ وشوونه‌يل خواست له‌ناونى هه‌رێم كوردستان و پاريزگايه‌يل عراقى و راسپاردن هه‌ردوگ وه‌زاره‌ت پێشمه‌رگه‌و ناوخوه‌يى ئه‌را ريكخستن ده‌وام كارمه‌نده‌يل پێشمه‌رگه‌و ئاسايش و هيزه‌يل ئه‌من ناوخوه‌يى.
