شۊێ قوربانیە هەولێریەگە "ديلان يوسف" باس خنکیانی و رزگاربۊی دۊیەتە بیماریەگەیان کەێد
شەفەق نیوز/ "ديلان يوسف" ژنیگە ٢٥ ساڵان، خەڵک شار هەولێر پایتەخت هەرێم کوردستان، دۊیای ئەوە ک دەریای ئیجە ئەو بەلەم خوەی و شۆیەگەی وە دۊیەتەگەی وەگەرد بڕی کووچبەر نوقم کرد، ئەویش خنکیا.
١٢ کووچبەر، دۊیەکە پەنجشەممە وەگەرد خیزانەگەی دیلان، لە ئەزمیر دانە دەریا وەرەو ئیتاڵیا، ئەوەیش وەگورەی دامەزراو "لوتكه" ئەرا باقەت پەنابەرەیل عراقی ک رەسیە "هۆشـنگ أيوب" شۊی قوربانیەگە.
شۊی قوربانیەگە داوا لە دامەزراوەگە کرد تەرمەگەی بارنە هەرێم کوردستان تا بنریەێدە خاک. ئەیوب لە تەمەن ٣٢ ساڵانە، ئەویش خەڵک شار هەولێرە، باس ووردەکاریەیل رووداوەگە کەێد؛ ک لە ساعەت ٢:٣٠ شەفەق دۊیەکە پەنجشەممە رووداوەگە بۊی.
ئۊشێد: لە ساعەت ٢:٠٠ شەفەق پەنجشەممە، وەگەرد ١٢ کەس تر، و گشتمان کورد بۊیمن لە سوریاو لە ئیران، سوار بەلەمیگ بۊیمن تا بڕەسیمنە یەختیگ لە نزیک خاڵ "ديدەم" وەلی بەلەمەگە چەن مەتریگ لەو شۊینە دۊرەو کەفت، چۊنکە کارکردنی خاس نەۊی، وە ناکاوەو قەڵبەو بوود، و منیش لەو مەوقە دۊیەتەگەم لە باوەشم بۊی، و هاوار کردیام و چڕیامە ناو ژنەگەم، وتیش: من و دۊیتەگەم قورتار بۊیمن، باوجی ژنەگەم لەناو ئاوەگە خنکیا.
شۊیەگە وە خەفەتیگ باس کەێد: من و دیلان وەرجە پەنج ساڵ هاوسەرگیری کردیمن، و مناڵیگ وەناو لەیا ئەرامان بۊی، وەلێ وەداخەو ک بیماری تەلاسیمیا دیرێد، و وەخاتر چاسەرکردنی پەنا وە کووچبردن بردیمن، وتیش: ئەرا چەن جاریگ داوا لەحکومەت کردمە فیزا وەپیمان بەێد، باوجی وەداخەو ک داواگەم جیوەجی نەکرد.
هەرلیوا، بڕیارە ئمڕوو جمعە، تەرمەگەی دیلان یوسف لە تورکیا بڕەسێدە هەرێم کوردستان، دۊیای تەواوکردن ریکارە یاساییەوە.
