سوو شایستەیل دارایی دیرکەفتگ جفتیارەیل هەرێم کوردستان خەرج کریەێد
2023-02-13T11:19:49+00:00
شەفەق نیوز/ نەرمین مەعروف خانمە ئەندام دەسەی دارایی لە پەرلەمان، ئمڕوو دووشەممە، مەوقەی خەرجکردن شایستەیل دارایی جفتیارەیل هەرێم کوردستان ئەرا ساڵەیل ٢٠١٥ و ٢٠١٦ راگەیان.
نوینەر پارێزگای سلێمانی لە بەیاننامەیگ رەسیە ئاژانس شەفەق نیوز وت: دویای رەزامەنی ئەنجومەن وەزیرەیل لە خەرجکردن شایستەیل دارایی جفتیارەیل ئەرا ساڵەیل ٢٠١٥ و ٢٠١٦، وە شیوەیگ فەرمی وەلایەن وەڕیەوبەرایەتی گشتی بازرگانیکردن دان ئاگادار کریام ک ئەوەسا سوو سێشەممە، وەزارەت بازرگانی عراق دەسکەێدە خەرجکردن چەک جفتیارەیل.
دیاری کرد ک ئەوەسا ٢٧٢ ملیار دینار خەرج کریەێد.
جی باسە جفتیارەیل لە هەرێم کوردستان ک بەرهەمیان لە گەنم جویە دانە وەزارەت بازرگانی یە چەن ساڵیگە پویلەگەی نەگردنە.
