سلێمانی.. دەسکریا وە هەفتەی روشنهویری کتاوخانەیل گشتی
پەیامنێر ئاژانس شەفەق نیوز وت: فیستواڵ روشنهویری ئامادەبوین وەزیر روشنهویری و گەنجەیل، و پارێزگار سلێمانی، و سەرۆک ئەنجومەن پارێزگای سلێمانی، و بڕی فرەیگ لە روشنهویرەیل و هونەرمەنەیل وەخوەی دی.
ئالان ڕەئووف وەڕیەوبەر گشتی کتاوخانەیل گشتی لە وتار وازکردن فیستواڵەگە گە ئاژانس شەفەق نیوز ئامادەی بوی وت: هەفتەی روشنهویری تا ماوەی شەش رووژ لە ئمڕووەو تا هەفت ئی مانگە وەردەوامە، و دیاری کرد کە دانیشتن گفتوگۆ و هویرکردن و سازیام پیشانگای فۆتۆگرافی و شیوەکاری و دەسڕەنگینی، و پیشانگای کتاو و بەشەوکردنی، و نمایشکردن فیلمەیل مناڵ و چالاکیەیلیگتر هاناو فیستواڵەگە.
وەڕیەوبەر گشتی کتاوخانەیل گشتی لە سلێمانی نرخدار تەقەلای گشت ئەو لایەنەیلە کرد کە پاڵپشتی وەڕیەوبەرایەتی کتاوخانەیل گشتی ئەرا چوارەم جارە لە سازیان ئی هەفتەی روشنهویریە کرد، و دەسخوەشی لە ئەرک فەرمانبەرەیل وەڕیەوبەرایەتی گشتی کرد کە شەو و رووژ کار ئەرا سەرکەفتن هەفتەی روشنهویری کردن، هەرچەن مووچەی مانگانەیان نەوردنە.
لەلای خوەییش، وەزیر روشنهویری و گەنجەیل لە حکومەت هەرێم کوردستان، حەمە سەعید، لەناو وتارەگەی پەیامیگ ئەرا حزبەیل سیاسی کل کرد، کە دیاری کرد کە ئی رەوش ئیسە لەلیمان خوازێد وەرد یەکتر بویمن، و یەکتری قەبووڵ بکەیمن، و وو ئاشتیانە وەیەکەو بژیەیمن، و گووش لەیەک بگریمن و ئی رەوش ئیسە بوینیمن، وەداخەو گووشیگ نییە ئەژنەوێد و نەیش چەویگ هەس کە بنووڕێد.
وتیش؛ فرە لە رووشنهویر و ئەدیب و نویسەرەیل پەیامیان ئەرا سیاسەتمەدارەیل و حزبەیل سیاسی کل کردن، لەناوی دیاری کردن کە رەوش کوردستان خاس نییە، و یە چشتیگ رخبەرە لەبان ژیان مەردم، وەلێ تا ئیسە کەسیگ جواو ئەو پەیامەیلە نەیایە.
