ئەرا یەکەمین جار لە عراق.. کورسی زیرەکیگ ئەرا بارگاویکردن و ئەنتەرنێت وە پەتی لەناوڕاس هەولێر (وینە)

پەیامنێر ئاژانس شەفەق نیوز وت، کۆمپانیای FTTH کە کەرت تایبەتە، و تا ئیسە کارکردنەیلی ها لە قۆناغ سەرەتایی، دەسکردیە وە ئەزموون کردن دانان چوار کورسی زیرەک، وتیش ئێ کورسی زیرەکە کارەبا لەرێ وزەی خوەر دەسی کەفێد ئەرا بارگاویکردن مۆبایلە زیرەکەیل و دابینکردن خزمەتگوزاری ئەنتەرنێت ئەرا گەشتیار و سەردانکەرەیل ناوڕاس هەولێر و بازاڕ لە مەوقەی پێویست.

وە سکانکردن کۆدەگە هاوڵاتیەیل توەنن بڕەسن وە ئەنتەرنێتیگ وە خێرایی بەرز کە توەنن ئەرا پەیوەنیکردن وەکاریبارن لە ماوەیگ دیاریکریاگ.

بڕیارە کۆمپانیاگە لە قۆناغ ئایندە شمارەی کورسیەگانی زیای بکەێد و ئێ کورسیەیلە لە شوینەیل تر لە کوردستان و هەولێر دابنەێد تا هاوڵاتیەیل سوودمەن بوون.

ئێ پرۆژە وە یەکەم دانرێد لە هەرێم و عراق وە گشتی، ئێ کورسیە لەوڵاتەیل دەوروگەرد عراق بوونی نیە.

تەنیا لە هەرێم کوردستان و هەولێر هەس، کورسی زیرەکەگە لەناو پارک شارەگە دانریاس، ئەرا خزمەتکردن وە هاوڵاتەیل نیشتەجیبوی و گەشتیارەیل.