"رەوشەیل ناوچەگە و پیکاتەیلی" لەبان مێز نێچیروان بارزانی و پەرلەمان ئەڵمانیا و ڤاتیکان
سەرۆکایەتی هەرێم لە بەیاننامەیگ رەسیە ئاژانس شەفەق نیوز وت: هەردوگلا باس پەیوەندییەیل ئەڵمانیا وەرد عراق و هەرێم کوردستان و رەوش ناوچەگە کردن.
وەگورەی بەیاننامەگە، پەرلەمانتارەیل ڕای خوەیان لە چوینیەتی پەرەپیدان پەیوەندییەیل ناوەین ئەڵمانیا و عراق و وەتایبەتی هەرێم کوردستان و ئایندەی هاوکاری ناوەینیان لە کەرتە جیاجیایل خستنە روی، و سوپاس ڕۆڵ هەرێم کوردستان کردن لە رویوەڕویبوین تیرۆر و هاوکاریکردن پیکاتەیل وە تایبەت ئێزیدییەیل.
لەلای خوەییش بارزانی سوپاس لە پەرلەمان و حکومەت و خەڵک ئەڵمانیا کرد ئەرا پاڵپشتیکردن هەرێم کوردستان و وەتایبەتی لە هاوکارییەیل ئەڵمانیا ئەرا ئێزیدیەیل کرد.
رەوش پیکاتەیل لە هەرێم کوردستان باسیگ ترەک لە گرنگیدانەیل دیدارەگە بوی.
هەرلیوا نێچیروان بارزانی، سەرۆک هەرێم کوردستان، دوياي نیمەڕو ئمڕوو شەممە لە کۆنفرانس ئاسایش میونشن لە ئەڵمانیا، وەگەرد پۆڵ گالاگەر، وەزیر دەرەوەی ڤاتیکان گردەو بوی.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس پەیوەندییەیل ڤاتیکان وەرد عراق و هەرێم کوردستان، رەوش مەزهەبەیل عراق و وەتایبەت هەرێم کوردستان، رەوش سیاسی و ئەمنی عراق، پەیوەندییەیل ناوەین هەولێر و بەغدا، و جەنگ غەززە، وە رەوش عراق و ناوچەگە وە گشتی کریا.
وەزیر دەرەوەی ڤاتیکان خواست وڵاتەگەی ئەرا وەردەوامی له پەرەپیدان پەیوەندییەیلی وەرد عراق و هەرێم کوردستان نشان دا، و دەسخوەشی لە رەوش پیکاتەیل و وەیەکەوژیان لە هەرێم کوردستان کرد، و دووپات کرد کە پاپای ڤاتیکان وە ڕێز و خوەشەویستی نووڕێدە هەرێم کوردستان.
لای خوەییش بارزانی سوپاس و پیزانین خوەی ئەرا ڤاتیکان کرد ئەرا وەردەوامی پاڵپشتیکردنی ئەرا عراق و هەرێم کوردستان و سڵاو ئەرا پاپای ڤاتیکان کلکرد و دووپات کرد کە کوردستان هەمیشە جویر وڵاتیگ وەیەکەوژیان و قبوڵکردن ئەوانەی ترەک و وەخشین مینێد.
