دویای ٤٣ ساڵ لە جینۆساید.. هیمان کوردەیل فەیلی مینەی روفات قوربانیەیلیان کەن
شەفەق نیوز/ ریخریاگ "گەرمەسێر" ئەرا کورد فەیلی لە سلێمانی، ئمڕوو سێشەممە، رسوومەیل ساڵیاد رووژ شەهید فەیلی وەڕیەو برد، وەبوووەی چل و سێ هەمین ساڵیاد جینۆسایدکردنیان وەدەس رژیم بەعس.
ئمڕوو ساڵیاد بارکردن شمارەیل گەپیگ لە عراقیەیل لە زەوی و ماڵ خوەیان وە دەسپیچگ نەتەوەیی و مەزهەوی، ک لە مانگ نیسان ساڵ ١٩٨٠ دەسکریا بەدترین کار دەرکردن و بارکردن کوردەیل فەیلی.
یادگار فەیلی سەرۆک ریخریایەگە ئەرا ئاژانس شەفەق نیوز وت: ئی رووژە رووژیگ نەهامەتیە لە ژیان دەیان هەزار کورد فەیلی ک کەفتنە وەر شکەنجە و کوشتن وەدەس رژیم بەعس لەناودریاگ وەرجە ٤٣ ساڵ لە ساڵ ١٩٨٠.
وتیش: رژیم بەعس لە ٤ نیسان ساڵ ١٩٨٠، بەدترین تاوانەیل لەبان کورد فەیلی جیوەوجی کرد، ک دەسوەسەرکردن و بارکردن هەزاران خانەوادەی فەیلی لە گشت پارێزگایل عراق وە دەسپیچگ درووکانی وەڕیەو چگ، ک گوایە ئیرانیین و عراقی نیین، و هیزەیل ئەمنی عراق چگنە ناو ماڵەیلمان، و وەرجە ئی رووژە ژوور بازرگانی بەغداد داوای گشت بازرگانەیل عراقی کرد، و فەیلیەیل جیاوە کرد و گشت بەڵگەیان لە ٨٠٠ بازرگان کورد فەیلی سەنەو، و پویلیان لەناو بانکەیل هشکەو کرد، و ماڵ و داراییان زەفت کرد، و وەزوور ئەرا ئیران باریان کرد.
فەیلی دیاری کرد ک لەی رووژەو شەوەیل تاریک لەبان کورد فەیلی هاتن، ک هیزەیل عراق ئەو سەردەمە خانەوادەیل فەیلی بار کردن، و کوڕەیلیان لە تەمەن ١٦ تا ٣٠ ساڵان خستنە زیندانەیل ئەبو غرێب و کازمیە و فزێلیە ئیجا هەواڵەیان کردنە نوگرەت سەڵمان، و زیاتر لە هەفت ساڵ لەورا مەنن، دویای ئەوە وەفەرمان سەدام بڕیار لەناوداین ئی گەنجەیلە جیوەجی کریا، لە وەختیگ خیزانەیلیان مەوقەی بارکردنیان لەناو شارەیل ئیران لە تەهران و ئیلام و کرماشان کەفتنە رووژەیل سەختیگ.
فەیلی دووپات کرد ک لە ساڵ ١٩٨٦ وەچەن گامیگ کوردەیل فەیلی لەناو دریان، بەشیگیان لەناو تیزاب تاویانەو، و بەشیگیان ئەرا ناو مینەیل کلکریان و وەپیان تەقیاوە.
وتیش: دویای رمیان رژیم سەدام حسێن، فرەی خیزانەیل فەیلی لە وڵاتەیل ئەرا عراق گلەو خواردن، وە مینەی روفات قوربانیەیلیان، و تەنیا لیست ناوەیلیان و بڕیارەیل کوشتنیان وەدەسیان کەفت، ک یەکەمین حکومەت دەنگ وەپی دریا، ک یەکەمین حکومەت مالکی بوی ریکاریل ویروداریگ جیوەجی کرد، ک باوەتەیل گرنگیگ ئەرا کوردیل فەیلی یەکلاوە کرد، وە گلەوداین رەگەزنامەی عراقی شمارە ٣ ئەرایان، تا خیزانەیل بتوەنن ماڵ و داراییان گلەو بیەن.
دەربارەی هەڵوێست نێچیروان بارزانی سەرۆک هەرێم کوردستان، یادگار فەیلی دووپات کرد ک سەرۆک نێچیروان بارزانی هەڵویست خاسیگ ئەرا کوردەیل فەیلی دیرێد، چوینکە کەسایەتییگ ئەرێنییە و سەنگینە، و داوا لەلی کرد نەوەیلی لە وەزارەتەیل کوردی بخەێدە کار و ری وەپیمان بەێد لەناو وەزرات کاروبار پیشمەرگە وەگەرد چەودیاریکردن نوینەرییمان لەناو پەرلەمان هەرێم لە دەستوور کوردستان.
