حكومەت کوردستان راگەینێد ووردەکاریەیل نوویگ لە مووچەی فەرمانبەرەیل و رێککەفتن سەربازی وەرد بەغداد
شەفەق نیوز/ حکومەت هەرێم کوردستان، ئمڕوو چوارشەممە، راگەیان ووردەکاریەیل نوویگ دەربارەی مووچەیل فەرمانبەرەیل هەرێم کوردستان و رێککەفتن سەربازیی وەگەرد حکومەت فیدڕاڵی.
جوتیار عادل قسەکەر وەناو حکومەت هەرێم کوردستان، لە کۆنگرەیگ رۆژنامەوانی ئمڕوو ئاژانس شەفەق نیوز ئامادەی بوی وت: حکومەت هەرێم نێچوودە ناو ململانەیل سیاسیی، و دووپات کرد ک خوەی کار ئەرا دابینکردن مووچەیل وە زویترین وەخت دابین بکەێد.
عادل وتیش؛ ئەوەسا شاند کوردی لە هەفتەی ئایندە سەردان بەغداد کەێد، و دیاری کرد ک حکونەتەگە ئامادەس گشت بەیاننامەیل بیەێدە دەس حکومەت بەغداد.
عادل وتیش؛ئیمە هیچ بانکەشەیلیگ نێخوازیمن، و هەرچەگ هەس ئەوەسا ئاشکرای راگەیاننی کریەێد، و گرنگی ئیمە جوور حکومەت ئەوەسا ک مووچەیل لە وەخت خوەی بیەیمن، یا شایەت چەن رووژیگ مەوقەگەی ئاڵشت بوود.
و مەزەنە کرد ک شایەت دیرکەفتن ئی مانگە ئەرا هەفت یا هەیشت رووژ بوود، و لە خود وەختەگە دووپات کرد ک بابەتە رای گشتی بزانێد ک ئی کارە وەختانەس و پەیوەندی وە باوەتەیل سیاسی نەیرێد.
وتیش؛ تا ئەوەنە هاوکاری لەناونی لایەنەیل وەگەرد حکومەت بوود ئەرا زیایکردن داهاتەیل، بڕین مووچەیل وەردەوام نێەوود، و حکومەت هەرێم ئیسە لە داهات مەرزەیل مووچەکان دابین کەێد و هیچیگ لە بەغداد ئارامان نەهاتگە.
دەربارەی رێککەفتن سەربازی وەگەرد بەغداد، عادل باس دروسکردن ژوور هەماهەنگی هاوبەش و هاوکاری خاسیگ لەناونی ئەفسەرەیل وەزارەت پێشمەرگە و وەزارەت وەرگری عراق کرد، و دیاری کرد ک جاری زویە ئەرا هەڵسەنگاندن رەوشەگە.
و دووپات کرد ک رێککەفتنەگە وە گشتی گام خاسیگە ئەرا کەمەوکردن پەلاماریل داعش لەو ناوچەیلە.
وتیش: بڕیار دایمن یاسا لە مەرزە سنووریەکان جیوەجی بکریەێد و رسوومەیل گومرگی بوودە یەکیگ، وتیش؛ رەوانەکردن هێزەیل وەرەو مەرزەیل ئەوە نیە کە ئیمە داگیر مەرزەیل کەیمن، وەلێ ئەگەر هاوکاری وەگەرد حکومەت بوود داهاتەیل زیایەو بوون.
و دیاری کرد ک حکومەت هەرێم کوردستان رکدارە لەبان جیوەجیکردن یاسا و کۆنترۆڵکردن مەرزە سنووریەکان، و دووپات کرد ک ئیمە پابەندیمن ک داهاتەیل ئی مەرزەیلە بایەدە بچنە ناو گەنجینەی دەوڵەت و سیاسەتکاری ئی باوەتە نەکریەێد.
هەمیش باس ئەوەیش کرد ک پڕۆژەی بوودجەگە تەواو بوی، و ئەوەسا یاساگە لە هەفتەی ئایندە لە ئەنجومەن وەزیران باس کریەێد.
دەربارەی رویوەڕوبینەیل پەکەکە و تورکیا، عادل دیاری کرد ک زەرەدەیل گەورایگ رەسانە ناوچەگە، وەتایبەت لە دهۆک ک خیزانەیل فرەیگ ئاوای بوبن، وتیش هێزەیل ئەو شوونەیلە زەرەدەیل گەورایگ رەسانە هەرێم کوردستان.
هەمیش وت: حکومەت هەرێم داوا لە تورکیا وئەو لایەنەیل کرد ک ململانەیلیان لە زەویەیل هەرێم دویرەو بخەن، و نێەویمنە لایەنیگ لەی جەنگە، و وەرپرسایەتیەگە کەفێدە بان حکومەت فیدڕاڵییش.
