حکومەت هەرێم کوردستان بڕیار رەوانەکردن شاندیگ وەرەو بەغداد دەێد
شەفەق نیوز/ حکومەت هەرێم کوردستان، ئمڕوو چوارشەممە، بڕیار رەوانەکردن شاندیگ وەرەو بەغداد دا، ئەرا دانوستانەگان لەباوەت شایستە داراییەگان هەرێم و مووچەی فەرمانبەرەیل.
ئەوەیش لە دانیشتن هەفتانەی حکومەتەگە وە سەرۆکایەتی مەسرور بارزانی سەرۆک ئەنجومەن وەزیران و قوباد تاڵەبانی جیگر سەرۆک ئەنجومەن وەزیران.
بارزانی لە سەرەتایی دانیشتنەگە وت: هیچ لایەنیگ چەنە حکومەت هەرێم نییە گرنگی بیەێدە ژیان هاووڵاتیبەگان، ک گشت تەقەلایگ ئەرا دابەینەکردن مووچەیل هەرێم کوردستان دا.
و دووپاتکرد ک شایستە داراییەگان هەرێم مافەیل شەرعی گەل کوردستانن، و قەت واز لەلیان نیێتێریمن، و ئەوەسا گفتوگۆەیلمان وەگەرد حکومەت فیدڕاڵی وەردەوام کەیمن ئەرا مسۆگەرکردن مافە دەستووریەیلمان.
سەرۆک حکومەت دیارکرد ک لەی رووژەیلە وەردەوام بویمن لە پەیوەندیەگان وەگەرد موستەفا کازمی سەرۆک ئەنجومەن وەزیران عراق، و پەیمانیگ لەلیان وەرگردیمن وە چارەسەکردن باوەت مووچەگان لەماوەی رووژەیل کەم ئایندە.
بارزانی وتیش؛ ئەگەر مووچەگان لە وەختە دیاریکریایەگە لە بەغدادەو نەڕەسینە هەرێم کوردستان، حکومەت هەرێم کەمیەگە لەڕی قەرزکردن پڕەو کەێد، تا ئەوەنە مووچەگان لە بەغدادەو رەسن، و ئیجا لەو پویلەیلە ک لە بەغدادەو تیەن قەرزەگە دریەێدەو.
ودویای دانوستان و باسکردن، سەرۆک ئەنجومەن وەزیران، وەناو ئەنجومەن وەزیران، فەرمان خەرجکردن مووچەی مانگ تەشرین یەکەم دا لە سوو پەنجشەممەو ٣ کانون یەکەم وە رێژەی سپۆنسەرکردنیگ رەسیە ٧٩ لەسەد.
هەمیش ئەنجومەن وەزیران بڕیار رەوانەکردن شاندیگ حکومەتی ئەرا بەغداد لە نزیکترین وەخت دا، وە ئامانج وەرگریکردن لە مافە دەستووریەگان هەرێم کوردستان، وەگورەی بەیاننامەی حکومەت هەرێم ک رەسیە ئاژانس شەفەق نیوز.
