یەکێتی داوای گورجکردن دەور ئاسایش لە خانەقین کەێد
![یەکێتی داوای گورجکردن دەور ئاسایش لە خانەقین کەێد](https://arcellabucket.fra1.cdn.digitaloceanspaces.com/media/arcella/1621515429693.jpeg)
شەفەق نیوز/ یەکێتی نیشتمانی کوردستان لە دیالە، ئمڕوو پەنجشەممە، داوای گورجکردن دەور ئەمنی و هەواڵگری ئەرا هێزەیل ئاسایش لە قەزای خانەقین کرد، و نواگردن خاوەن گوبەنەیل لە کەرتە ئەمنیەیلە و حەشد شەعبی.
ئیبراهیم حەسەن وەڕێۆبەر راگەیانن ناوەند رێکخستن یەکێتی ئەرا ئاژانس شەفەق نیوز وت: گورجکردن دەور ئاسایش لە خانەقین لە ڕوی ئەمنی و هەواڵگری گام گرنگیگە ئەرا بتەوکردن ئاسایش ناوخۆیی و مقەیەتیکردن گشت دەوروگردەیل قەزاگە لە پلان و تەقەلا تیرۆریەکان، لەو بەیاننامەیل زانیاریی ئەمنی تەواو و کەڵەکە بویە ک لەماوەی چەن ساڵ گوزەیشتە ئاسایش دیرێدەی.
و دووپات کرد ک هێزەیڵ ئاسایش وە رەنجەیل هەواڵگری و کارەیل جیاوازی توێنست نوای ریخریاگە تیرۆرەیل بگرێد، هەر لە رمانن رژیم وەرین تا ساڵ ٢٠١٧ لە هەر هەڕەشەیگ لەناوچەیل و ئاوایەیل خانەقین، و لەباربردن هەر تەقەلایگ ئەرا نزیکەوبوین لەلیان، و جەخت کرد لە گرنگی هەماهەنگی هەواڵگری و ئەمنی لەناونی دەزگا ئەمنیەکان و حەشد شەعبی وەگەرد هێزەیل ئاسایش.
وتیش؛ هێزەیل ئاسایش ئەمن و ئارامی لە گشت ناوچەیل خانەقین بتەو کردن دویر لە ناونشانەیل مەزهەبی و نەتەوەیی و خوەی مقەیەتیکەر گشت پێکهاتەیل بوی.
لەباوەتیگ پەیوەندیدار، حەسەن داوا لە فەرماندە و وەرپرسە ئەمینییەکان کرد نوای کەسەیلیگ بگرن لە دەزگا ئەمنیەکان و حەشد شەعبی مینەی فیتنە لەوەر هاندەرەیلیگ نەتەوەیی کەن، یا لەوەر بەرژەوەنەیلیگ تر، ئەرا مقەیەتیکردن ئاسایش کۆمەڵایەتی لە خانەقین و نواگردن هەر تەقەلایگ لەلایەن تاکە کەسیگ ئەرا پەلامار بارەگایگ سیاسی یا ئەمنی کورد لە خانەقین.
وەرپرس راگەیانن یەکێتی دووپات کرد ک ئەو قەیرانەگ چەن کەسیگ لە حەشد دروسی کرد وەخاتر چزدان و سوکایەتی وە ئاسایش و پێشمەرگە و هەسی سیاسی کوردی لە خانەقین، وە هەماهەنگی لەناوبەین ناوەند رێکخستن یەکێتی لە خانەقین و فەرماندەیل دەزگا ئەمنیەکان و حەشد شەعبی کۆتایی وەپی هات.
حەسەن باس گرنکی بڕین ریەیل کرد لەنوای ئەوانەگ لە کەرتە ئەمنیەکان گوبەن دانەن، و نەیلن سیستەمە ئەمنیە یاساییەگە ئەرا خوازینەیلیگ تاکانە و سۆکایەتیکردن وە پیڕووزیی وەکار بارن.