بەرزەوبوین گەورایگ لە ئامارەیل کۆڕۆنا لە ئیدارەی سەروەخوەیی
شەفەق نیوز/ دەزگای تەندروسی لە ئیدارەی سەروەخوەیی لە باکوور و خوەرهەڵات سوریا، ئمڕوو یەکشەممە، راگەیان تۆمارکردن ٨ مردن و ٣٠٤ تووشهاتن نوو وە ڤایڕۆس کۆڤید-١٩ لە ناوچەیل ئیدارەی سەروەخوەیی لە باکوور و خوەرهەڵات سوریا.
دکتۆر جوان موستەفا هاوسەرۆک دەزگای تەندروسی لە ئیدارەی سەروەخوەیی لە بەیاننامەیگ رەسیە ئاژانس شەفەق نیوز وت: مردنە نووەکان ئەرا سێ پیاو لە قامیشلۆ و یەک پیاو لە کۆبانی و پیاویگ تر لە شەهبا و یەک ژن لە دێرک و ژنیگ تر لە مەنبج تۆمار کریان.
موستەفا دیاری کرد ک ٣٠٤ تووشهاتن نوو وە ڤایڕۆس کۆڤید-١٩ لە ناوچەیل ئیدارەی سەروەخوەیی لە باکوور و خوەرهەڵات سوریا ئەرا ١٨٥ پیاو و ١١٩ ژن تۆمار کردنە.
تووشهاتنە نووەکان وەیجوورە بەشەوە بوین: ٣٠ حەسەکە، ٨٠ قامیشلۆ، ٣٥ دێرک، ٧ دەرباسیە، ٢٦ کۆبانی، ٥٣ ریقە، ٥٤ تەبەقە، ١٠ مەنبج، ٢ کامپ هۆل، ٧ شەهبا.
وتیش؛ شەش خاسەوبوین نوو تۆمار کردن.
جی باسە ک ژمارەی تووشهاتنەکان لە ناوچەیل ئیدارەی سەروەخوەیی لە باکوور و خوەرهەڵات سوریا رەسیە ١٣٨٨٣، لەلیان ٤٥٦ مردنە، و ١٤٣٦ خاسەو بوینە.
