پارتی مەزەنەی یەکلاکردنەوەی نزیکیگ ئەرا باوەتەیل گیرهاتگ وەرد بەغداد کەێد
شەفەق نیوز/ فراکسیۆن پارتی دیموکراتی کوردستان، ئمڕوو چوارشەممە، دووپات کرد ک پەیوەندی ناوبەین بەغداد و هەولێر دەسکردە گام نوویگ دویای دروسکردن حکومەت محمد شياع سودانی، و مەزەنەی یەکلاکردنەوەی بڕیگ لە باوەتەیل گیرهاتگ لە بانان نزیک کرد.
مەریوان قەرەنی نوینەر لە فراکسیۆنەگە ئەرا ئاژانس شەفەق نیوز وت: پەیوەندی ناوبەین حکومەتەیل هەولێر و بەغدا دەستوور عراقی کۆنتڕۆڵی کەێد، باوجی حکومەت فیدراڵی پابەند وە جیوەجیکردن مافەیل دارایی هەرێم کوردستان هەرلە ساڵ ٢٠١٤ ەو نەوی، ک بەش کەمیگ لە مافەیلی کل کردیاد، لەوەر هووکارەیلیگ جیاجیا.
قەرەنی وتیش: وەلێ دویای دروسکردن حکومەت محمد شياع سودانی و ئەو رێککەفتن سیاسیە ک حزبەیل هاوپەیمانی لە (ئیدارەکردن دەوڵەت) واژووی کردن، گام نوویگ لە پەیوەندی ناوبەین هەردوگ حکومەت دەسوەپی کرد، و دووپات کرد ک حکومەت سودانی رەزامەنی لە یەکلاییکردنەوەی فرە لە باوەتەیل گیرهاتگ ناوبەین هەردوگ لایەنەگە دەێد.
ئەندام دەسەی ئاسایش و وەرگری مەزەنە کرد حکومەت سودانی یاسای نەفت و گاز لەناو پەرلەمان عراق وە رێککەفتن وەرد حکومەت هەرێم بخەێدە پەرلەمان عراق، و هەمیش مافەیل دارایی هیزەیل پیشمەرگە لە بوودجەی ٢٠٢٣، و لە هیزەیل فیدراڵی جیایان نەکەێد، چوینکە هەردوگیان بەشن لە سیستەم وەرگری عراق وەگورەی دەستوور.
قەرەنی وتیش: خشتەی کارەیل سودانی کارەیل ململانە ناوبەین هەولێر و بەغدا هاناوی، جویر یاسای نەفت و گاز و جیوەجیکردن رێککەفتن شنگال و دادگای فیدراڵی، وتیش: ئەگەر حکومەت سودانی بتوەنێد پەیمانەیلی ئەرا هەرێم کوردستان لە چوارچێوەی ئەو وەخت دیاریکریاگە وەجی بارێد، ئەو مەوقە ئایندەی رووشنیگ ئەرا پەیوەندی ناوبەین هەردوگ لایەنەگە پەیا بوود.
وەرجەیە، نێچیروان بارزانی سەرۆک هەرێم کوردستان، لە دوو سەردان دویایی ئەرا بەغدا، وەگەرد محمد شياع سودانی سەرۆک وەزیرەیل فیدراڵی و ئەو لایەنەیل سیاسی هاس دویاترین رەوشەیل ئەمنی و سیاسی وڵاتەگە کرد.
