ئه‌نجومه‌ن خانه‌قین پشتگیری كه‌مپين "دی به‌سه " ئه‌كا
وه‌یه‌یش ئاماژه كردگه ك هوێچ دیارده‌ێگ یا حاڵه‌تێگ گه‌ناته‌كاری ماڵى و ئداری یا به‌رتيل وه‌رگردن له كار ئه‌نجومه‌نه‌گه نییه، و هاوڵاتیه‌یل وه وه‌رپرس هانداین گه‌ناته‌كاری ئه‌ڕا ئه‌نجامداین كاروباره‌یلیان زانستگه.
زیاتر وتگه: قاپیه‌یل ئه‌نجومه‌ن خانه‌قین وازن ئه‌ڕا هه‌ر شكاتێگ له گه‌ناته‌كاری و له هه‌ر وه‌رپرسێگ بوود تا سزاێ قانونی ده‌ر هه‌ق ئه‌وانه بگیریه‌ی ك ده‌س له گه‌ناته‌كاری و دزی دێرن.
نور ئاماژه وه‌یه‌یش كردگه ك ئه‌نجومه‌ن و ئداره‌ێ خانه‌قین ، پێشوازی ئه‌كه‌ن و خوازیار ئه‌وه‌ن هه‌ڵوژاردن قه‌زا و ناحیه‌گان بكرێه‌ێ كا ماوه‌ێ 15 ساڵه نه‌كریاگه و له كومسیون سه‌روه‌خوه‌ی هه‌ڵوژاردنه‌یل و په‌رله‌مان عراق داوا كردگه هه‌رچى زویتر ئاسانكاری ئه‌ڕا هه‌ڵوژاردن بكه‌ن.
مه‌حه‌مه‌د نور باس ئه‌وه‌یش كردگه بێ به‌ش كردن خانه‌قین له وه‌ركه‌فته‌ێ مالی و گه‌شه‌كردن و ده‌رفه‌ته‌یل دامه‌زرانن ، له ده‌سه‌ڵات ئه‌نجومه‌ن ئداره‌ێ شاره‌گه نییه و ئشاره كردگه‌سه ئه‌ڕا ئه‌وه‌گ ،وه‌رپرسیاری پشت گوش خستن خانه‌قین ئه‌كه‌فیگه مل هه‌ردو حكومه‌ت مه‌حه‌لی و ئتحادی و حكومه‌ت هه‌ریم كوردستان.
چالاكه‌یل و میدیاكاره‌یل و هونه‌رمه‌نده‌یل و چینه‌یل جیاواز مه‌ردم شار خانه‌قین ده‌س كردنه‌سه هه‌ڵمه‌تێگ له ژێر ناوونیشان (دی به‌سه) له ڕێ توڕه‌یل په‌یوه‌ندی كومه‌ڵاێه‌تی ، جور ناڕه‌زایه‌تی ده‌ربڕینێگ له وه‌راوه گه‌ناته‌كاری ماڵى و ده‌س درێژى كردن ئه‌ڕا بان موڵكه‌یل گشت و بێ به‌ش كردن جوانه‌یل له دامه‌زرانن حكومه‌ت كوردستان.
