یونامی هووکارەیل سەردان پلاسخارت ئەرا ئیران ئاشکرا کەێد
ئمڕوو یەکشەممە، پلاسخارت وە سەرۆکایەتی شاندیگ نوێنەرایەتی (یونامی) سەردان تەهران پایتەخت ئیران کرد و وەگەرد حسێن ئەمیر عەبدوڵڵاهیان وەزیر دەرەوە گردەو بوی.
نوێنەرایەتی نەتەوە یەکگرتگەیل ئەرا ئاژانس شەفەق نیوز راگەیان، "ئی سەردانە هاوتەریبە وەگەرد ئەرک نێردەی هاوکاری نەتەوە یەکگرتگەیل ئەرا عراق (یونامی) ئەرا ئاسانکاری لە گفتوگو ناوچەیی و هاوکاری لەبان بڕیگ پرس ئەرا پاڵپشتیکردنی عراق، و وەرجەیە سەردان چەن وڵاتیگ لەناوچەگە کردیە".
پلاسخارت لەی دویاییە سەردان تورکیا کردوێد، وەرجە ئەوەیش نوێنەرایەتییەگە سەردان ئوردن و کوەیت و شمارەیگ وڵاتەیل ناوچەگە کرد.
وەپەی ئەو ئەرکە کە لەلایەن ئەنجومەن ئاسایش نەتەوە یەکگرتگەیل وە شاندەگە دریاگە: “نوێنەر تایبەت ئەمیندار گشتی و یونامی رازیژکاری و پاڵپشتی و هاوکاری پیشکەش وە حکومەت عراق کەن لەباوەت ئاسانکاری ئەرا دانوسەنین و هاوکاری ناوچەیی، لەوانەیش لەبار ئاسایش سنوورەیل، پاکەوکردن مینە دانریاگەیل و تەقەمەنی دەسی و جیماگەیل جەنگ، وزە، بازرگانی، ژینگە، ئاو، کاریگەرییە بەدەیل ئاڵشتبوین کەشوهەوا وەتایبەت ئەوانەگ بەشدارن لە بیاوانبوین و هشکەساڵی، دروسکردن توانای وەرخودان، ژیرخانی ئابووری، تەندروسی گشتی، و پەنابەرەیل”.
لە وەرانەوەر ئەوە، ئاژانس خەوەری فارس بڵاو کردیە کە ئمڕوو حسێن ئەمیر عەبدوڵڵاهیان وەزیر دەرەوەی ئیران لە تەهران پایتەخت وەگەرد نوێنەر ئەمیندار گشتی نەتەوە یەکگرتگەیل لە عراق، جینین هێنیس پلاسخارت، باس دویاترین پیشهاتەیل عراق کرد.
ئاژانسه ئیرانییەگە وتیش؛ یە یەکەم سەردان پلاسخارته ئەرا تەهران له سەردەم حکومەت ئیسەی ئیران.
