پویچەوکردن رخبەرترین تووڕ ناودەوڵەتی بازرگانیکردن وە مادەی هووشبەر لە باشوور عراق
2023-07-14T08:44:08+00:00
شەفەق نیوز/ وەڕیەوبەرایەتی گشتی کاروبار مادەیل هووشبەر سەر وە وەزارەت ناوخوەی عراق، ئمڕوو جومعە راگەیان ئۆپراسیۆنیگ ئەمنی ئەنجامدانە ک وە " چوینایەتی و بی هەمتا" وەسفی کرد، لەئەنجام " رخبەرترین تووڕ ناودەوڵەتی" بازرگانیکردن وە مادەی هووشبەر دەسگیرکردنە ک لە سێ کەس پێکهاتنە لە پارێزگای موسەنا باشوور وڵاتەگە.
یەیش لە چوارچمگ هەڵمەتیگ نیشتیمانی ئەرا رویوەریبوین هووشبەر و ئەرکەیل جویری هاتیە ک وەڕیەوبەرایەتی گشتی کاروبار هوشبەر وەپی هەڵسیایە، وەپای ئە بەیاننامەیەی دەریکردیە و رەسیەس وە ئاژانس شەفەق نیوز.
لە بەیاننامەگەی وتیش، " تیمیگ کارکردن دروسکردن وە سەرۆکایەتی وەڕیەوبەر گشتی کاروبار مادەیل هووشبەر، وەڕیەوبەرایەتی کاروبار مادەیل هووشبەر کەرخ، وە بڕیار دادوەر، توەنستنە رخبەرترین تووڕ ناودەوڵەتی بازرگانیکردن وە مادەی هووشبەر دەسگیربکەن ک لە سێ تومەتبار پێکهاتبوین ک دوو ملیۆن دەنگە حەب مادەی هووشبەر جویر کبتاجون وە قورسایی 220 کیلوگرام وەپیان بویە لە پارێزگای موسەنا".
