وەزیر پیشەسازی: دروشم "دروسکریاگ لە عراق" وە کارگەیل بەرهەمکار وەدی تیەێد.. و لەنوای ئەرا پیشەسازییەیلیگە کە بازاڕیگ ناوخوەیی دیرن

شەفەق نیوز - ئەنبار

وەزیر پیشەسازی و کانزایەیل محمد نووری، ئمڕوو شەممە، دووپات کرد کە دروشم "دروسکریاگ لە عراق" وە دروشمەیل وەدی نیەتیەێد، بەڵکم وەو کارگە کە بەرهەم تیەرن، و ئەو کراکارە کە کار کەێد، و ئەو وەبەرهەمکارەیلە کە سەرکەفێد، و ئەو بەرهەمە کە کوالێتی خوەی لەناو بازاڕ چەسپنێد، و دووپات کرد لەبان داین گرنگی ئەرا ئەو بەرهەمە کە خوازیاری لەناو بازاڕ ناوخوەیی لە وڵاتەگە وەدەس تیەرێد.

یەیش لە وتەیگ هات کە لە وازکردن کارگەی تارق ئەرا بەرهەمهاوردن قڕکەرەیل کشتوکاڵی لە پارێزگای ئەنبار وە 4 کڕ بەرهەمکاری و 27 بەرهەم تایبەتمەن پیشکەشی کرد.

 نووری وت، کە دروسکردن ئی کارگە وە هاوبەشی وەگەرد کۆمپانیای دەرمانسازی، کە یەکیگە لە کۆمپانیایەیل کەرت تایبەت عراقی، نموونەیگ ئەرا هاوکاری پیشکەش کەێد کە کار لەبان فراوانکردنی کەیمن لەناوەین دامەزراوەیل دەوڵەت و کەرت تایبەت، دیاری کرد کە کارگەگە خاوەن چوار کڕ بەرهەمهاوردن تەواوە، وە تواناییگ کە رەسێدە 5 هەزار لیتر و 5 تۆن رووژانە لە قڕکەرەیل وە جۊرەیلیانەو، لەشان کڕەیلیگ ئەرا بەرهەمهاوردن قوتیەیل پلاستیکی، و تاقیگەیل تایبەتمەن ئەرا کۆنتڕۆڵ جویری و لێکۆڵینەوەیل، وەو شیوە کە گەردینیگ بەرهەمکاری تەواو دابین کەێد، هەمیش کارگەگە ئامادە بوود ئەرا بەرهەمهاوردن 27 جۊر لە قڕکەرەیل کشتوکاڵی.

 دووپات کرد کە وازکردن کارگەیگ نوو ئەرا ئیمە تەنیا وە مانای زیایکردن دامەزراوەیگ پیشەسازی نییە، بەڵکم وە مانای دەرفەت کاریگ نوو، و بەرهەمیگ عراقی نوو، و تواناییگ نیشتمانی زیاییە، وتیش کە گام ئایەندە وەرەو وازکردن پرۆژەیل و کارگەیل نوو چوود، و فراوانکردن هاوبەشییەیل وەگەرد کەرت تایبەت و وەبەرهاورەیل و کۆمپانیایەیل جەهانی باوەڕپیکریاگ.

و وەزیر لە قسەیلی وتیش: داین گرنگی ئەرا ئەو پیشەسازییەیلەس کە خاوەن بازاڕیگ ناوخوەیین، و دەرفەتەیل کار دابین کەن، و پشتگیری لە کەرتە زینگەیل جیاجیا کەن، و زیاتر وت: کار کەیمن لەبان لاوردن تەنگەژەیل لە وەردەم پرۆژە پیشەسازییە جدییەیل، و وازکردن بوار لە وەردەم هاوبەشییەیل نوویگ کە لەبان بنەمای سودمەنی ئابووری و لیهاتگی و کوالێتی وسن.