وەزیر دەیشت عراق لە ئیماراتەو هوشداری دەێد: جەنگیگ ئەگەری هەڕەشەی ناوچەگە دەێد
شەفەق نيوز/ فوئاد حسێن جیگر سەرۆک ئەنجومەن وەزیرەیل، و وەزیر دەیشت عراق، ئمڕوو شەممە، وە سەردانیگ فەرمی، رەسیە ئەبو زەبی پایتەخت ئیمارات.
خەلیفە شاهین ئەلمرر وەزیر دەوڵەت ئیمارات ئەرا کاروبارەیل دەرەکی لە پیشوازیکردن فوئاد حسێن بوی.
بەیانامەیگ لە نویسنگەی وەزیر دەیشت وت: لە دیدارەگە باس شیوەیل پاڵپشتیکردن پەیوەندییەیل ناوەین دوو وڵات کریا، وەگەرد دویاترین گەشەیل لە دانوسەنین ناوەین ئەمریکا و ئیران.
لەی باوەتە، فوئاد حسێن دووپات کرد لەبان گرنگی دویرکەفتن لە جەنگ لەناوچەگە، لەبان ئەو کاریگەرییەیل کارەساتیە کە لەبان گشتی لەشوینی تیەێد، و دووپاتیش لە گرنگی هاوکاری هەرێمی کرد ئەرا بیناکردن سیستەمگ ئەمنی وەردەوام تا مقیەتی لە بەرژەوەنیەیل گشت لایەنەیل بکەێد.
هەنی باس خوازین فرە ئەرا دروسکردن پێەڵەیل ئارامی کرد وەڕی پەیاکردن خاڵەیل یەکانگیربوین هاوبەش، وتیش: گفتوگۆکردن گونجیاگترین ریە ئەرا یەکلاییکردن ناکۆکییەیل و دویرکەفتن لە جەنگ.
لەلای خەوەییشر خەلفە دووپات کرد کە وەدەسهاوردن گەشەپیدان و ئارامی سیاسی لە ناوچەگە وەدەس نیەتیەێد مەگەر لەناو ژینگەیگ ئارام و ئاسایش، و باس گرنگی هەماهەنگی هاوبەش کرد لەباوەت میکانیزمەیل قایمکردن ئاسایش، وەتایبەت لە سای سەختیەیل ئیسە.
