ناوچەیگ عراقی نشانەیل هوشداری لە خنکیان دانەێد.. وینە
شەفەق نیوز/ چالاکوانەیلیگ لە قەزای بێجی باکوور سەڵاحەدین، ئمڕوو چوارشەممە، دەسکردنە هەڵمەتیگ هوشداری ئەرا نواگردن رویداوەیل خنکیان لەناو چەم و جووەیل.
چالاکوانەیلیگ ئەرا ئاژانس شەفەق نیوز وتن: کەسەیلیگ چالاکوان لە خەڵک بێجی، دەسکردنە هەڵمەتیگ هوشداری ئەرا کوڕ و گەنجەیل وخیزانیان وە داناین نشانەیل هوشداری لەوەردەم ئەو شوینەیل رخبەر قویلە لە چەم دیجلە، ئەرا نواگردن رویداوەیل خنکیان، ک لە وەرز تاوسان زیای بوون.
چالاکوانەیل داوا لە خەڵکەگە کردن هاوکاری وەرد هەڵمەتەگە بکەن، و گاڵ کوڕەیلیان بیەن پابەند وە نشانەیل هوشداری بوون، ودویر لە رویداوە مەرگبارەیل خنکیان بکەفن، وەگەرد هانداین لایەنەیل ئەمنی لە کارەیل مقەیەتیکردن ئەرا پشتگیریکردن هەڵمەتەگە.
سەڵاحەدین رویداوەیل خنکیان وەردەوامیگ لە وەرز تاوسان وەخوەی دوینێد، لەوەر مەلەوانی لەناو چەم و جووەیل ونەوین مەلەوانگەیل نموونەیی.
