لەوەر وەرسگی و هشکی.. ٢٥ ئاوای لە دیالە نیاز بارکردن دیرن
شەفەق نیوز/ خەڵک ٢٥ ئاوای لە ناحیەی عزێم لە باکوور دیالە، تەگبیر بارکردن لەناوچەیلیان دیرن کەوەر هشکەوبۊین سەرچەوەیل ئاوەگە و رخ لە هشکی و ورسگی.
محمد ئیبراهیم عوبەیدی سەرۆک وەرین ئەمجومەن عزێم ئەرا ئاژانس شەفەق نیوز وت: ٢٥ ئاوای لە عزێم نیاز دیرن وەرەو ناوچەیل باکوور و ناوچەیل کشتوکاڵی ئارام لە پاریزگایل تر بار بکەن، لەوەر هشکەوبۊین ئەمار ئاوەگە و داوەزین ئاو چەم عزێم، ک بۊیە بڕێ نمەک.
وتیش؛ فرەی ئاوایەیل ناحیەی عزێم هانە ژیر هەڕەشەی ورسگی و کارەسات ژیانو گوزەرانی دۊیای پۊچەڵکردن پلان کشتوکاڵی زمسانی و نەمان سەرچەوەی کاو وەگەرد زەرەدەیل گەورەیگ رەسنە سامان ئاژەڵی ک جۊر سەرچەوەیگە ئەرا گوزەران مەردمەگە.
عوبەیدی بانگواز فریاکەفتن ئەرا لایەنە پەیوەندیدارەیل ئورا چارەی گرفت هشکەساڵی و رزگارکردن دەیان لە ئاوایەیلە لە هیلاکی و کارەسات ئابووری کرد، وتیش: لەوەر داوەزین ئاو بەنداو عزێم ک پشت وە واران بەسێد ئاوەگە کەمەو بۊیە.
