لەوەر گرفتەیلیگ خیزانی خوازێ خوەی بکوشێد و برادەرەیلی قورتاری کردن
شەفەق نیوز/ برادەر دڵسووو وەفادار جوور برایگە ک داڵگد نەزایەسەی، ئەو برادەریە ک دوو گەنج خەڵک مووسڵ نشانی دان، هەنای لە دویاترین مەوقەی دوویەم تەقەلای خوەیکوشتن برادەریگیان لەوەر گرفتەیلیگ خیزانی قورتاری کردن.
عومەر ئەحمەد، یەکیگ لەو دوو برادەرەسە ئەرا ئاژانس شەفەق نیوز ئویشێد: ئی برادەر ٣٠ ساڵانەی ئیمە، وەرجە ماوەیگ لەوەر گرفتەیلیگ خیزانی تەقەلای خوەیکوشتن دا، وەلی خوەشبەختانە ک بڕیگ گەنج لە نزیک ئەو بۆڵە بوین لەو مەوقە ک برادەرەگەمان تەقەلا دا لەبانی خوەی بخەێدە خوار، و ئەو گەنجەیلە نەیشتنەی.
ئویشێد؛ ئەمروو خیزانەگەی خەوردارمان کردن ک لەماڵ دەرچگە و هەڕەشەی خوەیکوشتن داگە، ک ئیمە لەلای پوڵەیل شار مووسڵ وسیایمن، تا بەشکی وەرجەیە خوەی بکوشێد وەپی بڕەسیمن.
ئەحمەد هەمیش ئویشێد: من و برادەریگ تر لەلای چوارەم پوڵ لە شار مووسڵ وسیایمن،. و نووڕستیمن برادەرەگەمان لە ماشینەگەی داوەزێگ و وەرە کنار پوڵەگە تەکان دەێد تا خوەی بخەێدە چەم دیجلە، و ئیمەیش دویای ئەوە ک پاس لە تەیمان پوڵەگە رەد کرد رەسیمنە پی و گردیمنەی، هەرچەن ئەویش زوور کردیاد تا خوەی بخەێدە، وەلی خاس بوی ئیمە هاوردیمنەی بان.
