لە ناوچەیلیگ عراق واران وارێد و پلەی گەرما نزمەوبوود
2023-02-02T08:35:10+00:00
شەفەق نیوز/ کەشناس عراقی عەلی جابر زیادی، ئمڕوو پەنجشەممە، مەزەنەی واران وارین لە ناوچە جیاوازەیل وڵاتەگە کەێد لەماوەی ساعەتەیل ئایندە.
زیادی وە ئاژانس شەفەق نیوز وت، ئمڕوو پەنجشەممە وڵاتەگە کەفێدە ژیر کاریگەری کەشوهەوای واراناویگ لە ماوەی چەن ساعەت ئایندە، ئاشکەرایکرد باکوور و سەڵاحەدین کاریگەری ورانەگە مامناوەندە.
وتیش مەزەنەکریەێد وارانەگە ناوچەیل ناوڕاسیش بگردێەو، لەلیشیان بەغدای پایتەخت و دیالە، دیاریکرد واران وارین لە ناوچەیل فورات ناوڕاس کەمە تا پرزە پرزەس لە ناوچە دویرەیل.
زیادی دیاریکرد پلەی گەرما دەسکەێد وە داوەزین کەمیگ لەوەخت ئمشەو وە هووکار رەدبوین بارستە وایگ ک خوەرئاوای وڵات تێد و لەبڕیگ ناوچە وای باکوور خوەرئاوا چالاکە.
