لە دوو پارێزگا.. دراوردن خنکیاییگ و دەسگیرکردن 8 کەس وە توومەت تیرۆر و تاوانەیل ترەک
2024-08-08T08:08:18+00:00
شەفەق نیوز/ سەرچەوەیگ ئەمنی لە بەسڕە، ئمڕوو پەنجشەممە، خەوەردا لە دراوردن تەرم گەنجیگ خنکیاگ لەناو شەتولعەرەب، و وەزارەت وەرگیریش دەسگیرکردن هەشت داواکریاگ راگەیان وە توومەت تیرۆرستبوین و بازرگانیکردن وە مادەی هووشبەر و قاچاغکردن نەفت لە بەغداد.
سەرچەوەگە وە ئاژانس شەفەق نیوز وت، "پۆلیس دەریاوانی تەرم گەنجیگ لەداڵگبوی 1998 لەئاو شەتولعەرەب دراوردنە، تەرمەگەی ئەرا پزیشک دادوەری کلکردنە تا رێکارەیل یاسایی تەواوبوود".
وتیش؛ " لێکۆڵینەوە لە رویداوەگە وازکریاس ئەرا زانستن رویداوەگە".
هەمیش، وەڕێوەبەرایەت گشتی هەواڵگێری و ئەمن سەر وە وەزارەت وەرگیری لە بەیاننامەیگ رەسیە ئاژانس شەفەق نیوز راگەیان، مەفرەزەیل وەڕێوەبەرایەت هەواڵگێری و ئەمن بەغداد توەنستن ئەندامیگ تیرۆرست دەسگیربکەن، و شەش و شەش بازرگان و بڵاوەوەپیکەر مادەی هووشبەر و یەک کەس ترەک وە توومەت قاچاغکردن بەرهەمە نەفتیەیل لە ناوچە جیاوازەیل پایتەخت.
دیاریکرد، گشت دەسگیرکریاگەیل فەرمان دەسگیرکردن ئەرایان دەرچگە وەپای مادەی 1/4 تیرۆر، و28 هووشبەر، و رێکارەیل یاسایی وەرانوەریان گیرێد ئەرا دادگا کلکریەن.
