كوشتن مناڵیگ و زەخمداربوین یەکیگ تر وە تەقینەوەیگ لە ئەنبار

شەفەق نیوز/ سەرچەوەیگ خۆجێیی لە ئەنبار، ئمڕوو سێشەممە، خەوەردا لە کوشتن مناڵیگ و زەخمداربوین یەکیگ تر وە تەقینەوەی مینیگ لە جیماگەیل ریخریاگ داعش لە پارێزگاگە.

مەبروک جغێفی قایمقام قەزای حەدیسە ئەرا ئاژانس شەفەق نیوز وت: مینیگ لە جیماگەیل ریخریاگ داعش تیرۆرست، لە یەکیگ لە ئاوایەیل سەروە ناحیەی پەروانە، ئمڕوو تەقیەو، و بویە هووکار کوشتن مناڵیگ تەمەنی لە دە ساڵان رەد نەکردگە، و زەخمداربوین سەخت یەکیگ تر.

جغێفی وتیش: چەن ناوچەیلیگ هەس ک هیمان زیان لە جیماگە جەنگیەگان وەخوەیان دوینن ک تا ئیسە پاک نەکریانە، هەرچەن داوا لە حکومەت خۆجێی و ناوەندی وەوە کریاگە، و باس لە خەفەت خوەی کرد ک نەڕەسیا چارەسەرییگ ئەرا رزگارکردن خەڵک ئی ناوچەیلە لە جیماگەیل داعش.