شوونگر عامرێ قه‌سه‌م خوارد و په‌رله‌مانيش داواى خه‌رجكردن مووچه‌ى دامه‌زرياگه‌يل كرد
شه‌فه‌ق نيوز/ فه‌رمانگه‌ى ره‌سانن ئه‌نجومه‌ن نوێنه‌ره‌يل عراقى، ئاشكراى ئه‌وه كرد شوونگر هادى عامرى سه‌رۆك هاوپه‌يمانى فه‌تح قه‌سه‌م ده‌ستوورى خواردگه، يه‌يش ده‌رخست ك داواكارييگ له‌لايه‌ن سه‌رۆكايه‌تى ئه‌نجومه‌نه‌گه ئاراسته‌ى وه‌زاره‌ت دارايى كرياگه له‌باره‌ى خه‌رجكردن مووچه‌ى ئه‌وانه‌گ تازه دامه‌زريانه.
فه‌رمانگه‌گه له به‌ياننامه‌يگ ئه‌را ئاژانس شه‌فه‌ق نيوز وت: عه‌بدولكه‌ريم ئه‌نسارى قه‌سه‌م ده‌ستوورى خواردگه جوور ئه‌ندام له شوون هادى عامرى ك له دانيشتن وه‌رين ده‌س له‌كاركيشاوه.
به‌ياننامه‌گه باس له‌وه‌يش كرد سه‌رۆكايه‌تى ئه‌نجومه‌ن نوێنه‌ره‌يل رينمايى داسه ئه‌ميندارێتى گشتى ئه‌نجومه‌نه‌گه داواكارييگ ئاراسته‌ى وه‌زاره‌ت دارايى بكا له‌وه‌ر خه‌رجكردن مووچه‌ى كارمه‌نده‌يل تازه دامه‌زرياێ له چوارچيوه‌ى جموجويل مه‌لاك هه‌ميشه‌يى ساڵ 2019.
