کەشوهەوای عراق تا کۆتایی ئی هەفتە
شەفەق نیوز/ دەسەی کەشناسی عراق، ئمڕوو دووشەممە، مەزەنەی کەشوهەوای وڵاتەگە ئەرا ئی رووژەیل بانانە بڵاو کرد، و باس وەردەوامی داوەزیان پلەی گەرمی کرد.
دەسەگە لە بەیاننامەیگ رەسیە ئاژانس شەفەق نیوز وت: کەشوهەوای وڵاتەگە ئەرا سوو سێشەممە، رووشنە وەگەرد لەکە ئەوریگ، و پلەی گەرمی نزیک رووژ وەرجە خوەیە لە ناوچەیل باکوور و باشوور، و لە ناوچەی ناوڕاس کەمیگ نزمەو بوود، و دیاری کرد کە پلەی گەرمی مەزن لە بەغداد و دیالە رەسێدە ٣٩ پلەی سەدی، ولە کەربەلا ٤٠ پلە، و بابل و واست و دیوانیە و نەجەف ٤١ پلە، موسەنا ٤٣ پلە، زیقار و بەسرە و میسان ٤٥ پلەی سەدی.
وتیش: رووژ چوارشەممە، لە ناوچەی ناوڕاس و باکوور ئاسمان رووشنە وەگەرد لەکە ئەوریگ، و پلەی گەرمی نزیک رووژ وەرجە خوەیە، و لە ناوچەی باشوور پلەی گەرمی کەمیگ نزمەو بوود.
دیاری کرد کە رووژ پەنجشەممە، لە گشت ناوچەیل وڵاتەگە ئاسمان رووشنە وەگەرد لەکە ئەوریگ، و پلەی گەرمی نزیک رووژ وەرجە خوەیە.
دەسەگە وتیش: کەشوهەوای وڵاتەگە ئەرا رووژ جمعەی ئایندە، لە گشت ناوچەیل وڵاتەگە ئاسمان رووشنە وەگەرد لەکە ئەوریگ، و پلەی گەرمی نزیک رووژ وەرجە خوەیە.
