کەشناسی عراق.. شەپوول واران نوویگ رەسێدە وڵات
دەسەگە لە بەیاننامەیگ رەسیە ئاژانس شەفەق نیوز وت: كەشوهەوای وڵاتەگە ئەرا سوو پەنجشەممە، لە ناوچەی ناوڕاس رووشنە و کەمکەم بوودە نیمچە ئەور، و لە ناوچەی باکوور نیمچە ئەورە وەگەرد دروسبوین ئەور مەوقەی شەوەکی کەمکەم پاکەو بوود، و لە ناوچەی باشوور رووشنە وەگەرد لەکە ئەورە، و پلەی گەرمی لە بەش ناوڕاس نزیک رووژ وەرجە خوەیە، ولە بەشەیل باکوور و باشوور کەمیگ بەرزەو بوود.
وتیش: رووژ جمعە، لە گشت ناوچەیل وڵاتەگە نیمچە ئەور و ئەور تەواوە، و پلەی گەرمی نزیک رووژ وەرجە خوەیە.
دیاری کرد کە، رووژ شەممە، لە ناوچەی ناوڕاس و باشوور ئەورە وەگەرد نمە وارانیگ و گرمەهڕ، و پلەی گەرمی کەمیگ نزمترەو بوود، و لە ناوچەی باکوور نیمچە ئەورە و لە شەو واران و گرمەهڕە، و پلەی گەرمی کەمیگ بەرزەو بوود.
دەسەگە : کەشوهەوای وڵاتەگە ئەرا رووژ یەکشەممەی ئایندە، لە ناوچەی ناوڕاس ئەورە وەگەرد واران سووکیگ تا نیمەڕوو، و لە ناوچەی باکوور نیمچە ئەورە، و لە ناوچەی باشوور ئەورە وەگەرد واران و گرمەهڕ، و پلەی گەرمی لە بەشەیل ناوڕاس و باکوور نزیک رووژ وەرجە خوەیە، و لە ناوچەی باشوور چەن پلەیگ نزمەو بوود.
