سوپای عراق لە بیاوان حەزەر جەنگ وەرد داعش کەێد

شەفەق نیوز/ سەرچەوەیگ ئەمنی لە پارێزگای نەینەوا، ئمڕوو شەممە، خەوەردا کە هیزیگ لە سوپای عراق وەگەرد ئەندامەیل ریخریاگ داعش لە بیاوان حەزەر باشوور خوەرئاوای موسڵ کەفتە جەنگ.

سەرچەوەگە ئەرا ئاژانس شەفەق نیوز وت: هیزیگ لە سوپای عراق لە فیرقەی ٢٠ و لیوای ٤٣، دەورەی تونێلیگ دا کە شمارەیگ لە ئەندامەیل ریخریاگ داعش لە بیاوان جزیرەی حەزەر لەناوی بوین، کە بویە تەقەکردن لە هەردوگلا.

 سەرچەوەگە وتیش: ئی ئۆپراسیۆنە لە چوارچیوەی هەڵمەت وەشکین وەلایەن هیز سەربازی لە ناوچەگە تیەێد، وە مینەی چەتەیل ئەو ریخریاگ تیرۆریستیە.

هەرلیوا، سەرچەوەیگ ئەمنی ترەک وت: ئەو تەقەکردنە بویە هوکار کوشیان یەکیگ لە ئەندامەیل داعش لەناو تونێلەگە.