کەسەیلیگ نەناسیاگ دزی لە مەزاریگ ئاینی لەناوڕاس بەغداد کەن
2023-01-15T12:42:06+00:00
شەفەق نیوز/ سەرچەوەیگ ئەمنی، ئمڕوو یەکشەممە، خەوەردا ک کەسەیلیگ نەناسیاگ چینەسە ناو مەزاریگ ئاینی لەناوڕاس بەغداد پایتەخت، و پویل لەناوی دزینە.
سەرچەوەگە ئەرا ئاژانس شەفەق نیوز وت: بڕیگ کەس نەناسیاگ، ئمڕوو پەنجەرەی مەزار شێخ جونەید بەغدادی لەناوچەی عەلاوی ناوڕاس بەغداد شکاننە، و بڕیگ پویل لەناوی دزینە.
دیاری کرد ک دزەیل وەرەو شوینیگ نادیار واینە، و لێکۆڵینەوە لە رویداوەگە واز کریا.
مزگەفت و مەزار شێخ جونەید بەغدادی لە مزگەفتەیل ئاسەواری کۆنەی عراقە لە بەغداد، و چوودەو ئەرا سەردەم خەلیفەی عەباسی مەئمون، و لە سەردەم شانشینی عراق وەلایەن شاە غازی فراوان و خاسەو کریا، و لە ساڵ ١٩٨٠ لەنووەو بینا کریا.
