سیروان و دیجلە گیان دوو گەنج لە کەلار و سەڵاحەدین سینن
شەفەق نیوز/ دوو سەرچەوەی ئەمنی، ئمڕوو شەممە، خەوەردان لە خنکیان دوو گەنج لە مەلەوانییان لەناو چەمەیل سیروان و دیجلە وە دوو رویداو جیاجیا، یەکەمیان لە ناوچەی کەلار لە ئیدارەی گەرمیان لە هەرێم کوردستان، وئەوەکە لە پارێزگای سەڵاحەدین.
سەرچەوەیگ ئەمنی ئەرا ئاژانس شەفەق نیوز وت: گەنجیگ لەداڵگبوی ٢٠٠٣ لەناو چەم سیروان مەوقەی تەقەلای مەلەوانیی لەناوچەی رزگاری سەروە قەزای کەلار خنکیا، ودیاری کرد ک تەرمەگەی دراوردن و رەساننەی پزشک دادوەری، ودەزگا ئەمنیەیلە لێکوڵینەوە لە رویداوەگە واز کردن.
لە سەڵاحەدین، سەرچەوەیگ ئەمنی ئەرا ئاژانس شەفەق نیوز وت: گەنجیگ لە تەمەن ١٩ ساڵان لەمەوقەی تەقەلای مەلەوانیی لە چەم دیجلە لەناو ئاوای خەزرانیە سەروە ناحیەی سەهل ئەخزەر لە قەزای شرقات خنکیا، وخەڵکەگە کەفتنەسە مینەی تەرمەگەی.
لە وەرز تاوسان، چەن پارێزگایگ عراقی، لەوەر نەوین مەلەوانگەیل نموونەیی وپەنابردن وە مەلەوانی ناو چەم وجووەیل، رویداوەیل خنکیان توومار کەن.
