سەرۆک عراق دەربارەی خۆپیشاندانەگان سلێمانی: ری وە کاریگ نەیەن ئەنجامی پەشیمانی بوود
شەفەق نیوز/ بەرهەم ساڵح سەرۆکی کۆمار، ئمڕوو سێشەممە، بەیاننامەیگ لەباوەت رووداوەگان لە شار سلێمانی و رەوشەگان لە هەرێم کوردستان دەرکرد.
ساڵح لە بەیاننامەیگ وت: وە نیگەرانی و گرنگی فرەیگ چەودێری لە گەشەیل رووداوەگان چەن رووژیگ لە شار سلێمانی کەیمن، لە خۆپیشاندان و ناڕەزایەتی جەماوەری و ئەو کارەیل توندوتیژبە وەگەردیان بوی، ک بوینە هووکار زەخمداربوین ژمارەیگ لە هاووڵاتیەگان و هێزە ئەمنیەگان، و ژمارەیەک لە بیناگان کەفتنە وەر سزانن و ویران کردن.
وتیش: دووپات کەیمن ک خۆپیشاندان ئاشتەوایی مافیگ دەستووریە وبایەدە رێز لەلی بکریەێد و پێشیلکاری لەبانی نەکریەێد، و ماف هاووڵاتەیلە خۆپیشاندان ئەرا داوای مافەیل خوەیان بکەن، وە تایبەت ئەوەگ پەیوەندی وە دابینکردن ژیان گونجیاگ ئەرا خوەیان وخیزانەیلیان لە مووچەگان دیرێد، و خاسەوکردن رەوشەگان و خزمەتگوزارییە گشتیەگان.
سەرۆک کۆمار وتیش: بایەدە دەسەڵاتە پەیوەندیدارەگان ئی داواکاریەیلە جیوەجی بکەن، و کار ئەرا چارەسەرکەردن ریشەیی ئەرا گرفتەیل مووچەگان و خاسەوکردن رەوشەیل ژیان بکەن، ئەوەیش لەڕی کامەیلیگ زوینە و راسی ک جەخت بکەێدە بان ئاشکرایی و تەرخانکردن داهاتەیل گەل ئەرا خزمەت هاووڵاتیبەگان، و پەسەنکردن ری ڕاستەقینەیگ ئەرا چاکسازی، ک پێشێلکاری لەبان دارایی گشتی و گەندەڵی ئیداری و دارایی و تاڵانکردن و قاچاخی بایەدە بووسیەنەو.
وتیش: لەیلا دووارەو کەم، ک توندوتیژی چارە نییە ئەرا نواگردن داواکاریە شەرعیەگان هاووڵاتیەیل، و بایەدە رێز لە خوازین و داواکاریەیل خۆپیشاندەرە ئاشتەواییەگان بکریەێد، و داوا لە هێزە ئەمنیەگان کەیمن وەگورەی یاسا رەفتار بکەن، و لە کارەیل توندوتیژی دویرەو بکەفن، و ری بیەنە میادیایل راگەیانن تا کارەیل خوەیان وە ئازادی بکەن.
ودیاریکرد ک پەنا بردن وە توندوتیژی هەڵەی گەورایگە، و ریە راسەگە نییە ئەرا پەیاکردن چارەسەریەگان، ک وەکارهاوردن توندوتیژی ناو هێزە ئەمنیەگان خراو کەێد ک ئەرک خوەیان لە مقەیەتی ئاسایش و ئارامی و مقەیەتی گیانەیل ودارایی خەڵکەگە جیوەجی نێەکەن، وهەمیش توندوتیژی ناو خۆپیشاندەرەگان خراو کەێد و داواکاریەیلیان لەری دەرکەێد.
سەرۆک عراق دووپاتکرد ک لەی باوەتە بایەدە دەسەڵاتەیل هەرێم گووش بیەنە داواکاریە راسیەگان لە هاووڵاتییەگان، و بایەدە هاووڵاتییەگان رێز لە هێزە ئەمنیەگان بگرن و مقەیەتی داراییە گشتیەگان و ئاسایش گشتی بکەن، و دووارەی داواکاریمان لە خۆپیشاندەرەگان و هێزە ئەمنیەگان کەیمن لە توندوتیژی دویرەو بکەفن، و ری وکاریگ نەیەن ئەنجامەگەی پەشیمانی بوود.
هەمیش داوا لە لایەنەیلە کرد ک لە حکومەتگە بەشدارن وەزویترین وەخت چارەسەریەیلیگ ریشەیی ئەرا قەیرانەگان پەیا بکەن تا داواکاریەیل خۆپیشاندەرەگان جیوەجی بکەن، و خاسترین ری لە نوای حکومەت هەرێم ئەرا چارەسەرکەردن قەیرانە داراییەگە خوەی ئەوەسە ک بڕەسێدە رێککەفتن گشتگیریگ وەگەرد حکومەت فیدڕاڵی لە باوەت مووچەگان و شایستەیل هەرێم، ئەرا دابینکردن ژیان ئازاد و سەربەرزیگ ئەرا هاووڵاتییەگان.
