رەشید داوای مەرەقەزکردن ئاو چەمەیل سنووری کەێد
شەفەق نیوز/ عەبدوللەتیف رەشید سەرۆک کۆمار عراق، ئمڕوو چوارشەممە، داوا لە هاوتەریب ئیرانیی مەسعود پزیشکیان کرد ئاو چەمەیل سنووری
مەرقەز بکریەێد، و پزیشکیان پێشنیار کرد بەرنامەیگ ستراتیژی دانریەێد ئەرا هاوکاری هاوبەش لە کەرتەیل تەندروسی و ژینگە و پیشەسازیو ئاسایش و گەشتوگوزار کە هەرێم کوردستانیش بگرێدەو.
رەشید لە بەیاننامەیگ رەسیە ئاژانس شەفەق نیوز وت: ئەو پەیوەندیەیلە کە ئی دوو وڵات برادەرە گردەو کەن، پەیوەندییەیل قایم و میژوویین، دیاری کرد کە ئیران دەوڵەتیگ هاوسای گرنگە ئەرا عراق و پایەی هەرێمی گەورەیگ دیرێد لە پشتگیریکردن و ئارامی ناوچەگە، و عراق پشتگیریکردن لە قایمکردن هاوکاری هاوبەش کەێد ئەرا لەناوبردن تیرۆر و تونەڕەوی و بتەوکردن ئاسایش سنوور و کارکردن ئەرا کۆتاییهاتن وە ئاڵووزیەیل ناوچەگە.
سەرۆک کۆمار لە قسەیلی دووپات لە گرنگی گورجکردن بەندەیل رێککەفن و یادداشتەیل لەیەکفامسنن ناوەین دوو وڵات، و قایمکردن بنەمایل برادەری وەوەگ خزمەت بەرژەوەنی هاوبەش ناوەین دوو وڵاتەگە کرد.
وتیش: سیمایل ئاڵشتبوین کەشوهەوا لە دیارترین سەختیەیلە لەڕوی ئی دوو وڵاتە و جەهان وەگشتی، و دووپات لە گرنگی کار هاوبەش لەی باوەتە کرد، وەتایبەتی باوەت ئاو، و لە خود وەختەگە داوای مەرەقەزکردن ئاو چەمەیل سنووری و رەسین ئەرا لەیەکفامسنیگ کرد کە گشتی لەبان بەشەوکردن ئاو رازی بکەێد.
لەباوت شایستەیل دارایی لەبان حکومەت عراق ئەرا لایەن ئیران، سەرۆک کۆمار دووپات کرد لەبان گرنگی کارکردن ئەرا پەیاکردن لەیەکفامسنن هاوبەش و شیوەی گونجیاگ ئەرا دایین ئەو شایستەیلە ئەرا کۆمار ئیسلامی ئیران و وەپیچەوانەو.
سەرۆک کۆمار شەرنەزا٥ئەە پەلامارە کرد لەبان کۆمار ئیسلامی ئیران، کە شەهید ئیسماعیل هەنیە لەلی بویە قوربانی، و دووپات لەبان هەڵوێست بنەمایی و چەسپیای عراق وەرانەور باوەت فەلەستین کرد، و ماف گەل فەلەستین لە وەدەسهاوردن تەمایلی و گشت مافەیل دادپەروەرانەی لەبان زەوی خوەی.
لەلای خوەییش، سەرۆک پزیشکیان سوپاس و رێزی ئەرا گەرمی پیشوازیکردن و میوانداری پیشکەش کرد، و نرخدار تەقەلایل سەرۆک کۆمار کرد لە قایمکردن بنەمایل برادەری و پەیوەندییەیل ناوەین دوو وڵات و دوو گەل هاوسا، و دووپات لەبان رکداری کۆمار ئیسلامی کرد لە قایمکردن پەیوەندییەیل وەرد عراق لە گشت چینەیل، و هەماهەنگی لە گشت ئەو باوەتەیلە کە گرنگییان هاوبەشە.
سەرۆک کۆمار ئیسلامی ئیران هەمیش داوای دروسکردن دەسەیگ هاوبەش ناوەین دوو وڵات هاوسا کرد ئەرا داناین بەرنامەی ستراتیژی ئەرا هاوکاری هاوبەش لە کەرتەیل تەندروسی و ژینگە و پیشەسازی و ئاسایش و گەشتوگوزاری کە هەرێم کوردستانیش بگرێدەو.
