دويای جەنگ تونیگ لە دێر زور سوریا.. ئامادەباشی عراقی لەبان سنوور
سەرچەوەیل ئەرا ئاژانس شەفەق نیوز وتن: ئی کارە وەگەرد سەختەوبوین جەنگەگە لە پارێزگای دێر زور سوریا تیەێد، ناوەین هووزەیل عەرەبی و هیزەیل هەسەدە کە هیشت هیزەیل ئەمریکا دەس بینەوەر ئەرا پشتگیریکردن هەسەدە.
وتنیش: کەرتەیل سوپای عراقی و حەشد شەعبی کەفتنە ئامادە باشی لە رخ رویدانیگ نەخوازیاگ، چوینکە ناوچەیل بیاوانی جەزیرە ناوەین پارێزگایل نەینەوا و سەڵاحەدین هاتە کەنار دێر زور سوریا.
لەلای خوەییش، فەرمانگەی لیوای ئەسار مەرجعیە لە حەشد شەعبی، حەمید یاسری، فەرمان دادە ئەندامەیل لیواگە بکەفنە ئامادە باشی سەربازی لە ناوچەیل جەزیرە لە پارێزگای نەینەوا، و مقیەتیکردن سنوور عراق و سوریا.
یاسری لە بەیاننامەیگ رەسیە ئاژانس شەفەق نیوز داوا لە گشت ئەندامەیل لیواگە کرد، وەگەرد ئەوانەیش کە هانە هوچان، زویوەزوی گلەو بخوەن ئەرا جەزیرەی نەینەوا.
میدیایل سۆشیال میدیا باس رخەیلیگ لەبان سنوور عراق و سوریا کردن، لەلای پارێزگای نەینەوا، دویای ئەوە کە گرووپەیلیگ چەکدار لە هووزەیل عەرەبی لە چەن ئاواییگ نزیک سەربازگەیل ئەمریکی زاڵەو بوینە، دویای جەنگ سەختیگ وەرد هیزەیل هەسەدە.
پارچە ڤیدیۆییلیگ نشان دان کە ئەو گرووپەیلە کە ناو خوەیان وە ( هیز رووژەیل) نانە، لە ناوچەی ئەبو حەمام خوەرهەڵات دێر زور گردنە، دویای دەرکردن هیزەیل هەسەدە لەناوی.
