دەسگیرکردن یەکیگ لە لایەنگرەیل سەرخی داوای رمانن مەنزڵگایل ئاینی کردیە

شەفەق نیوز/ سەرچەوەیگ ئەمنی لە پارێزگای بابل، ئمڕوو دووشەممە، راگەیان دەسگیرکردن کەسیگ لە لایەنگرەیل پیاو ئاینی شیعە مەحمود سەرخی،  لەپشت داواکردنی وە رمانن مەنزڵگایل ئاینی لە قەور و مەقامەیل پەیغەمبەر و ئیمامەیل.   

سەرچەوەگە ئەرا ئاژانس شەفەق نیوز وت: ناونریاگ (عەلی موسا عاگوڵ کازم مەسعودی) خەتیب و ئیمام مزگەفت فەتح موبین لە قەزای حەمزە غەربی لە پارێزگای بابل دەسگیر کریا، ک سەروە بزووتنەوەی سەرخیە. 

و دیاری کرد ک دەسگیرکیایەگە لە خوتبەی نماز رووژ جمعەی گوزەشتە داوای رمانن قەور ئیمامەیل ئەهل بەیت کردگە، و دووپات کرد ک دەسگیرکردنی وەگورەی یاداشت دەسگیرکردن لەلایەن دادگای حلە وەگورەی مادەی ٢٠٠ لە یاسای سزادان عراقی شمارەی ١١١ ئەرا ساڵ ١٩٦٩ هاتیە.