دەسگیرکردن سەرکردەیگ سەرخی و کەسیگ تەقەلای سزانن مزگەفتیگ داگە لە بەغداد
شەفەق نیوز/ ئۆپراسیۆنەیل بەغداد، ئمڕوو پەنجشەممە، خەوەردا لە دەسگیرکردن شمارەیگ لە توومەتبارەیل وەگورەی فەرمانەیلیگ یاسایی جیاجیا و سەرکردەیگ لایەنگر بزووتنەوەی سەرخی لەناویان بۊ، و توومەتباریگ وە سزانن ماشینەیل خەڵک، و کەسەیلیگ وە "دەگەی" هووزانە، و گیرهاوردن (٤٢٩) ماتۆرسکڵ و توکتوک لە بەغداد پایتەخت.
فەرماندەی ئۆپراسیۆنەیل بەغداد لە بەیاننامیگ وت: کەرتەیل فیرقەیل پیادەی پانزە، یەکەم و دۊەم پۆلیس فیدراڵی، مەفرەزەیل هاوبەش، توەنستن ٣٣ توومەتبار وە فەرمانەیلیگ یاسایی جیاجیا دەسگیر بکەن، چواریان لایەن مرافەیگ هووزانە بۊنە لەناوچەی "حوریە" و توومەتباریگ دوو ماشیژ لەناوچەی "باب شێخ" سزانیە، و بازرگانیگ مادەی هوشبەر (٦٠٠) گرام مادەی کریستال وەگەرد ئامێر وەکارهاوردن و یەک دەوانچە وەپی بۊە لە ناوجەی سەبعلبۆر، ژنیگیش وەتوومەت ساختەکاری.
بەیاننامەگە وتیش: سەرکردەیگ لایەنگر بزووتنەوەی سەرخی لەناوچەی نەهرەوان دەسگیر کریا، و دەسنریا بان بڕیگ چەک و گولەی بیمووڵەت، وەگەرد بڕیگ مادەی کریستال هوشبەر وەگەرد ئامێر وەکارهاوردنی، و گیرهاوردن ٤٢٩ ماتۆرسکڵ و توکتوک.
هەرلیوا، سەرچەوەیگ ئەمنی وەرپرس ئەرا ئاژانس شەفەق نیوز وت " هیزیگ لە پۆلیس بەغداد، کابرایگ دەسگیر کرد خوازیە یەکیگ لە مزگەفتەیل لەناوچەی حەی عامل ئاگر بەێد.
لەی رووژەیل گوزەشتە، لەناو نماز جمعە، خەتیبەیلیگ سەرخی داوای رمانن مەنزڵگایل ئال بەیت کردن، ک بۊە هووکار توڕەیگ لە جادەی عراق، تا دەیان کەس پەلامار مزگەفت و حسێنیەیل سەروە سەرخی بیەن، و دەیانیش لەلیان وەلایەن دەزگا ئەمنییەیلە وە توومەت تونەڕەوی و دروسکردن گوبەن و فیتنە دەسگیر کریان.
