خوه‌ينيشانداينه‌يل له باشوور بويه هووكار ده‌س له‌كاركيشانه‌وه‌ى وه‌رپرسيگ تر عراقى
2019-11-29T09:22:01+00:00
شه‌فه‌ق نيوز/ ده‌مه‌و شه‌وه‌كى ئمڕوو ته‌ڵال بيلال جيگر پاريزگاى نه‌جه‌ف، ده‌س له پۆستگه‌ى كيشاوه‌و له‌وه‌ر ناڕه‌زايه‌تى له‌بان ئه‌و رێ وشوونه‌يل حكوميه ك گيرياسه وه‌ر دوياى كوشتن و زه‌خمداركردن چه‌ن خوه‌ينيشانده‌ريگ له پاريزگاگه.
بيلال له لێدوانيگ ك له‌ڕى گرته‌يگ ڤيديۆيى بڵاو كريا، وت: ئه‌وه‌گ له عراق روێ ئه‌ياد له خوه‌ينيشانداين جايه‌ڵ جوانه‌يل و ژن و مناڵ ته‌نيا له‌تى نيشتمان ئه‌خوازن، يه‌يش له‌وه‌ختيگ حكومه‌ت گشت داواكاريه‌يليان پشتگووش خستگه‌و چه‌نه‌ها كوشياگ و زه‌خمدار كه‌فته‌سه‌و له پاريزگايه‌يل.
بيلال ك دويه‌م وه‌رپرس ناوچه‌ييه ده‌س له پۆسته‌گه‌ى كيشاسه‌و له نه‌جه‌ف، وت: هاتيمنه‌سه ناو ئى حكومه‌ته‌و ئوميد ئه‌وه كرديم بويمنه به‌شيگ له چاره‌سه‌ر، وه‌لێ راسيه‌يل ئه‌وه ده‌رخستن ك هويچ چاره‌سه‌ريگ وه‌ل ئى حكومه‌ته نيه.
