تا سەرەتای مانگ شوبات...عراق کەفێدە وەر نزمە پاڵەپەستۆ واران و سەرما
2024-01-24T08:18:35+00:00
شەفەق نیوز/ کەشناسعەلی جابر زیادی راگەیان، عراق کەفێدە وەر کاریگەری نزمە پالە پەستۆی نوویگ لە رووژ جومعەی ئایندە، بوودە هووکار واران وارین و داوەزیان پلەی گەرمی تا کۆتایی مانگ کانوون دویەم.
زیادی وە ئاژانس شەفەق نیوز وت، "عراق کەفێدە وەر کاریگەری رەدبوین نزمە پالەپەستۆ واران وارین لە شەوەکی رووژ جومعەو، ناوچە جیاوازەیل شارەیل عراق گرێدەو"، ئاشکەرایکرد "فرەیگ لەناوچەیل دەرفەت واران وارین رفت دیرن وە تایوەت ناوچەیل باکوور و بەشەگان ناوڕاس و باشوور وڵات.
وتیش "لە شەو جومعە واران وسێد و لە ئیوارەی شەممە دوارە گلەوخوەد ئەرا شارەیل ناوڕاس وڵات"دووپاتکرد "مەزەنەکرێد لە 29 کانوون دویەم دوارە واران گلەوبخوەد، لەکۆتایی مانگ قویلترەوبوود، هاتێ لەسەرەتای مانگ شوبات وەهەمان شیوە بوود".
زیادی دیاریکرد "عراق کەشوهەوای سەردیگ وە خوەی دوینێد، وەرد داوەزین وەرچەویگ پلەی گەرمی لە رووژ شەممەوە، لە رووژ یەکشەممە زیایترەوبوود، و سەردی کەشوهەوا وەردەوام بوود وەشیوەی جیاواز تا سەرەتای مانگ ئایندە".
