بەڵگەنامە.. مەسیحییگ سکاڵای وەزیریگ عراقی کەێد
شەفەق نیوز/ هانی حەبیب گۆرگیس مەسیحیە لە بەغداد پایتەخت نیشتگە، وەگورەی قسەگانی؛ دویای ئەوەگ ریەگان لەلی تەنگەو بوین، دەر دەوڵەت کوتا، شایەت لە هەژاری رزگاری بکەێد، بەڵکم تا چەن ساڵیگ هیچ وەدەسی نەکەفت، تا بڕیاردا سکاڵای دادوەری لە دادگای ئیداری تۆماربکەێد دژوە وەزیر کار و باوەتە کۆمەڵایەتیەگان لەوەر رەتکردن وەزارەتەگە لە داین مووچەی فریاکەفتن ئەرای.
گۆرگیس ئەرا ئاژانس شەفەق نیوز وت: وەرجە چەن ساڵیگ داواکاری دامە وەزارەت کار و باوەتە کۆمەڵایەتیەکان ئەرا شمول کردنم وە یاسای مقەیەتی کۆمەڵایەتی ژمارە ١١ ئەرا ساڵ ٢٠١٤، بەڵکم وەزارەتەگە داواکاریەگەم رەتکرد وە دەسپیچگ ک من نیمە ژیر هێڵ هەژاری و خاوەن دارییم لە ماڵ وماشین.
وتیش؛ دویای رەدتکردنەگە ستەمکاربوینم خستمە وەردەس ئەرا دەسەی باڵای مقەیەتی کۆمەڵایەتی، بەڵکم دەسەگە ستەمکاربویەگەم لە ٢٠١٩/٩/٢٩ رەتکرد، و پشتگیری بڕیار بەش مقەیەتی کۆمەڵایەتی رەسافە کرد، ومن دانا لە بان ئاست هەژاری، و منیش هاووڵاتی مەسیحییم و باوگ چوار کوڕ و دوێتیگم، و ئیسە لەماڵ یەکەیگ لە کەسوکارەیلم لە ناوچەی بەلەدیات وە کرا دانیشتمە.
هاووڵاتیە مەسیحیەگە وتیش: دویای ئەوە سکاڵایگ دادوەری لە دادگای ئیداری کردم دژوە وەزیر کار و باوەتە کۆمەڵایەتیەگان لەوەر شمول نەکردنم وە چەودێری کۆمەڵایەتی.
گورگیس دیاریکرد ک سکاڵاگە ک وە کتاوەیلیگ فەرمی خریاسە وەردەس ک لە وەزارت و فەرمانگە و دامەزراوەیل دەوڵەت دەرچینە و پشتگیری قسەیلم کەن، ک من هیچ ماڵیگ یا بەشیگ زەوی یا ماشینیگ نەیرم وهیچ مووچەیگ وەر نێگرم.
