یەکیگیان پولیسە.. پەیاکردن تەرم دوو. پیاو کوشیای نزیک مەزاریگ ئاینی لە دیالە
2024-08-31T09:16:17+00:00
شەفەق نیوز/ سەرچەوەیگ ئەمنی وەرپرس، ئمڕوو شەممە، خەوەردا لە پەیاکردن تەرم دوو پیاو یەکیگیان ئەندامە لە هیزەیل پولیس فیدڕاڵی، نزیک مەزاریگ ئاینی باکوور خوەرهەڵات پارێزگای دیالە.
سەرچەوەگە ئەرا ئاژانس شەفەق نیوز وت: هیزیگ ئەمنی تەرم دوو پیاو پەیا کرد یەکیگیان بەڵگەنامەی پولیش وەپی بویە، و ئەوەکە نەناسیاس، و شوین چەن گولەیگ وەلەشیانەو بویە، لە جوو مەزاریگ ئاینی وەناو (ئیبراهیم سەمین) لە ناوچەی کەشکوول دەورگرد ناحیەی قەرەتەپە.
سەرچەوەگە وتیش: دەزگایل ئەمنی دوو تەرمەگە ئەرا پزشک دادوەری بردن، و لێکۆڵینەوە ئەرا رەسین وە بندروس رویداوەگە واز کردن.
