کابرایگ سەرخوەش لە بابل نەفت کەێدە بان ژنەگەی و ئاگری دەێد
2023-05-04T08:56:57+00:00
شەفەق نیوز/ فەرماندەیی پولیس بابل، ئمڕوو پەنجشەممە، دەسگیرکردن کابرایگ راگەیان، ک مەوقەی سەرخوەشیی ئاگر لەش ژنەگەی خوەی داگە، ئەوەیش دویای دەمەقاڵیگ خیزانی لەناو ماڵەگەی لە باشوور پارێزگاگە.
فەرماندەییەگە لە بەیاننامەیگ رەسیە ئاژانس شەفەق نیوز وت: دویای توومارکردن ئاگاداری ک ژنیگ لە قەزای هاشمیە خوەی سزانیە، نویسینگەی قەزاگە دەسکردە لێکۆڵینەوە و گردەوکردن زانیاری، و گومان لەبان شویەگەی بوی.
وتیش: دویای قویلەوکردن لێکۆڵینەوە و ئاشکراکردن بەڵگەیل، شوی ژنە قوربانیەگە وەزوان خوەی ئاشکرا کرد ک نەفت رشانیەسە بان ژنەگە و ئاگری داگە، لەبان گرفتەیلیگ خیزانی، تا وەلایەن دادوەر وەگورەی مادەی ٤٠٤ لە یاسای سزادان بخریەێدە زیندان، تا تەواوکردن ریکارەیل یاسایی.
