کوشیان چوار کەس لە ئەنجام وارانیگ کە یە ٢٠٠ ساڵە لە کۆریای باشوور نەویە
وەرپرسیگ دەزگای کەشناسی کۆریای باشوور ئەرا ئاژانس فرانس پرێس وت: "سێ ناوچە وارانیگ وە بەرزترین ئاست وەخوەیان دین، وە ریژەیگ کە تەنیا نزیکەی هەر ٢٠٠ ساڵ جاریگ توومار کریەێد".
زانیارییە کەشناسیەیل دەرخستن کە سێ ناوچە: گومسان لە باشوور چانگچۆنگ، چیۆبۆنگنێونگ لە باکوور چانگچۆنگ، و گونسان لە باکوور جیۆلا بەرزترین ریژەی واران وەخوەیان دین.
قسەکەرەگە ئەرا ئاژانس فرانس پرێسی وت: "یە وە بەراورد وەرد ئاستە تززمارکریایل وەرین نیەیمنە قەڵەم"، وتیش: توومارکردن زانیاری تەواو لە ساڵ ١٩٠٤ دەسوەپی کردگە.
هەمیش و: "وە هەشمارکردن رفتری واران هەر ناوچەیگ، ئەوە دەرخەێد کە رویداویگ وەیجویرە لە ٢٠٠ ساڵ جاریگ بوود".
لە گونسان، شەوەکی ئمڕوو چوارشەممە، لە ماوەی یەک ساعەت 131.7 ملم واران واریە، کە زیاتر لە 10%ی بڕ واران ساڵانەی ناوچەگە بویە.
لە وینەیل کەناڵە تەلەفزیۆنییەیل کۆریای باشوور دەرکەفێد کە لەوەر واران رفتەگە، بەشیگ لە چەمەیل ئاویان رسیاسە ناو ریەیل و لافاو لەلییان هەڵسیاس، و خەڵک هاهە ناو ئاوەکە کە لە چەن شوینیگ رەسیەسە ئاست کەمەر.
وەزارەت ناوخۆی راگەیان کە لەوەر وارانەگە چوار کەس گیانیان لەدەسدانە.
وەگورەی ئاژانس خەوەری یۆنهاپ، تیمەیل فریاگوزاری تەرم کەسیگ پەیا کردنە کە لەناو پاچینەیگ گیرهاتوێد، دویای ئەوەگ لافاو چگە ناو شوقەیگ لە شار نۆسان لە باشووری چونگچۆنگ.
وتیش: قوربانییگ ترەک پەیا کریا دویای ئەوەگ لە مەوقەی وەشکین بەرهەمەیلی لە شار داێگو، پیاوەگە کەفتیەسە ناو سیستەم ئاوەڕۆیل.
پیایبگیش وە ماشین وەرەو ماڵ گلەو خواردیە دویای شوانی ئاژەڵەیلی لە باکوور چونگچۆنگ، دویای نزیکەی سێ ساعەت تەرمەگەی پەیا کریاس.
ئاژانسەگە بڵاو کرد کە پیاییگ تەمەن هەفتا ساڵان لە ئەنجام رمیان ماڵەگەی لە شار سیۆچۆن گیانی لەدەسدا.
لی سانگ مین، وەزیر ناوخۆ لە بەیاننامەیگ وت: داوا لە خەڵک کەم لە مەوقەی واران نەچنە گەراجەیل ژیرزەوی یا تونێلەیل و چەمەیل.
