کوشیان دوو مناڵ و زەخمداری 11 کەس وە کردەوەیگ چەقوکیشان لە بەریتانیا
پۆلیس ئەرا رووژنامەوانەیل راگەیان گەنجیگ 17 ساڵان دەسگیرکریاس کە دەسدیرێد وە تاوان کوشتن و تەقەلای کوشتن داین لە نزیک لیڤەرپول لە باکوور خوەرئاوای ئنگلتەرا، دیاریکرد تا ئیسە هووکارەگەی دیارنییە.
پەلامارەگە وەرجە نیمەڕووی دویکە لە ساعەت (11:00 وەخت گرێتش)، دووشەممە، لە شار ساوسبۆرت کناراو بویچگ رویدایە کە نزیکەی بیس کیلومەتر دویرە لە باکوور لیفەربول.
ئاشکەرایکرد " مناڵەیل خەریک ئامادەکاریگ بوینە لەباوەت ( گورانیچڕ) تایلۆر سویفت لەناو مەکتەو سەماکردن هەنای پەلاماردەر چوودەناو وەچەقویگ و پەلامار مناڵەیلە دەێد".
کینیدی رویداوەگە وە " پەلاماریگ توند" وەسف کرد، راگەیان دوومناڵ کوشیاس و نۆی ترەک زەخمدارە کە شەش کەسیان بارودۆخی ناجیگیرە، دیاریکرد دوو گەنجیش زەخمدارن و بارودۆخیان ناجیگیرە، کە هەنای زەخمداربوینە تەقەلای پاراستن مناڵەیلە دەن، وتیش ،" گشتیان وە چەقوو زەخمدارکریانە".
