هیزەیل ئەمریکا بنکەیلیان لە سوریا چووڵ کەن و کاروانە سەربازییەیل وەرەو عراق بەن

شەفەق نیوز/ رووژنامەی "The Cradle"ی ئەمریکی، ئمڕوو چوارشەممە، ئاشکرا کرد، کە سوپای ئەمریکا لە ناوڕاس مانگ ئازارەو دەسکردیەسە وە هەڵوەشانن بەشیگ لە بنکە سەربازییەیلی لە باکوور خوەرهەڵات سوریا، یەیش لە چوارچیوەی کیشانەوەی کەمکەم و بردن هیز و کەرەستەی سەربازی وەرەو خاک عراق.
رووژنامەگە لە ڕاپۆرتیگ کە ئاژانس شەفەق نیوز ئەڵگەردانی کرد وت: "کەرەستەی سەربازی و ئەفسەر و سەرباز لە بنکەیلە خوەرهەڵات چەم فوراتەو وەرەو باکوور عراق بردیە، وەبی ئەوەگ وەزارەت وەرگری ئەمەریکا لەبان ئی جویلە چشتیگ فەرمی بڵاو بکەێد".
لە ڕاپۆرتەگە باس ئەوە کرد کە "کیشانەوەیل بریتی بوین لە بنکەیل ریف حەسەکە، جویر "ماڵ هچانخواردن وەزیر" و بنکەی "خانەدانی کێڵگەیل ئەلجەبسە" لە شار شەدادی، بیجگە لە کەمکردن سەربازیی لە ئاوای خوەرهەڵات دێرەزوور، وەتایبەتی لە بنکەیل کۆنسکۆ و ئاوای سەوز و کێڵگەی نەفت ئەلعومەر".
وەگورەی ڕاپۆرتەگە، هیز و ئامرازەیل لەو شوینەیلە وەرەو بنکەی شەدادی بریانە جویر ئامادەکارییگ ئەرا جیگیرکردنی لە هەرێم کوردستان.
وەگورەی رووژنامەگە، "لەماوەی چەن رووز گوزەشتە چالاکیی خەسیگ کۆپتەر و فڕۆکەی بێفڕۆکەوان لە ئاسمان دێرەزۆر و حەسەکە و قامیشلۆ بویە، و هەلیکۆپتەریش کە کاروانە سەربازییەیل وە یاوەرییەو لە حەسەکەو وەرەو سنوور عراق چگن".
وتیش: "ئی گامەیلە لە وەختیگ کە دانوسەنین وەردەوام ناوەین تورکیا و ئیسرائیل وە ئامانج دامەزرانن کڕ جیاوەبوین لە سوریا وەڕیەو چن، ئەرا دویرکەفتن لە هەر کاریگ سەربازی ناوەین هیزەیل هەردوگ وڵات لە چوارچیوەی خاک سوریا".
سەرەتای ئمساڵ کەناڵ ئێن بی سی نیوز ئاشکرا کرد کە پنتاگۆن دەسکردیە وە لێکۆڵینەوە لە پلانەیل کیشانەوەی تەواوەتی لە سوریا لە ماوەی ٣٠ تا ٩٠ رووژ، یەیش وە پشتبەسین وە زانیارییەیل بازنەیل نزیک لە دۆناڵد ترەمپ، سەرۆک ئەمریکا.
وەرانوەر ئەوە، هیزەیل سوریای دیموکرات وتیە هویچ هەماهەنگییگ وەگەردی نەویە ئەرا کیشانەوەی ئەمریکا لە ناوچەیل ژیر دەسەڵات خوەیان لە باکوور و خوەرهەڵات سوریا.