ژنیگ میسری کوورپەی خوەی کەێدە شاگرد ژنیگ گەیاکەر
شەفەق نیوز/ دەزگا ئەمنییەیلە لە وڵات میسر، دوو ژن دەسگیر کردن، یەکیگیان دۊتە کوورپەگەی نایەسە لای ئەوەکە ک گەیا کەێد، تا نیمەی داهاتەگەی بەێدە پی. سەرچەوەیگ ئەمنی ئەرا میدیایل راگەیانن وت: پۆستیگ لەبان فەیسبووک هیشت هۊردەکارەیل ئەو کردەوە ئاشکرا بوود، و دوو توومەتبارەگە دەسگیر بکریەن.
پۆستەگە باس پەیاکردن دۊەتیگ کوورپە لەناو کیسەیگ پلاستیگ لەناو فارغۆن قەتاریگ لە قاهیرە کرد.
سەرچەوەگە وتیش: دەزگا ئەمنییەیلە کەفتنە مینەی بندروس ئی کارە، تا رەسینە ژنەگە، و دەرکەفت ک لە پاکەوکردن لە پارێزگای جیزە کار کەێد، و هەمیش گەیاکەری کەێد، و تاوانەیلیگ وەرین دیرێد.
ئەو ژنە ئاشکرا کرد ک خوەی ئەو کوورپە پەیا کردگە و لەلای خوەی هیشتیەسەی.
دەزگا ئەمنییەیلە رەسینە داڵگ ئەو کوورپە، و دەرکەفت ک ماڵی هالە سەیدە زەینەب، و ئاشکرا کرد ک خوەی ئەو مناڵە لەناو قەتارەگە هیشتیەسە جی، و زانستیە ک هالای ئەو ژنەگە.
سەرچەوەگە دیاری کرد ک دۊای چەن رووژیگ، هەردوگ ژنەگە رەسینە یەک، و ڕێک کەفتن ک مناڵەگە لەلای ژنە گەیاکەرەگە بمینێد، و گەیا وەپی بەکێد، و نیم داهات گەیاکردنەگە بەێدە داڵگ کوورپەگە.
