ئیلۆن مەسک دەسمیەتی ئۆکرانیا دەێد
شەفەق نیوز/ دامەزرێنەر کۆمپانیای سپەیس ئێکس و وەڕێەوبەر جیوەجیکار کۆمپانیای تێسلا، ئێلۆن مەسک لە ری مانگە دەسکردەیل ستارلینک خزمەتگوزاری ئینتەرنێت ئەرا ئۆکرانیا دابین کەێد.
ستارلینک زنجیرەیگ مانگ دەسکرد کۆمپانیای سپەیس ئێکسە، ک ئامانج لە دروسکردنیان دابینکردن خزمەتگوزاری ئینتەرنێتە ئەرا گشت دانشتگەیل رۊ زەۊی، وەگورەی هەواڵیگ وێبسایت " politico"، لەدۊای بڕیان ئینتەرنێت لە ئۆکرانیا، ئێلۆن مەسک ئینتەرنێت ئەو وڵاتە دابین کەێد.
وێبسایت "politico" دیاریکەێد، ئی گامەیل ماسکە لە جواو داواکاریەگەی جێگر یەکەم سەرۆک وەزیرەیل ئۆکرانیا و وەزیر ئاڵشکاری دیجیتاڵی میخایلۆ فێدۆرۆڤ هاتییە ک لە رووژ شەممە داوای دەسمیەتی کرد، لەوەر ئەو پەلامارەیل ئەلکترۆنی وەردەوامەیلە وەلایەن رووسیا کرێدە بان وڵاتەگەیان.
میخایلۆ فێدۆرۆڤ لە تویتیگ ک ئاراستەی ئێلۆن مەسک کرد نۊسایە " مەوقەی تو تەقەلا دەێد مەریخ داگیر بکەێ، رووسیا تەقەلای داگیرکردن ئۆکرانیا دەێد، مەوقەی مووشەکەیل تو وە سەرکەفتی لە مەریخ نیشێدەو، مووشەکە رووسیەگان مەردم سڤیل ئۆکرانیا وە ئامانج گرن، ئیمە داوا لەلید کەێمن وێستگەی ستارلینک ئەرا ئۆکرانیا دابین بکەێ."
ئێلۆن مەسک لە جواو تویتەگەی میخایلۆ وتییە "ئیسە خزمەتگوزاری ستارلینک ئەرا ئۆکرانیا گورجەو کریاگە."
