کەشوهەوا مەردم کوشێد...ئاماریگ جەهانی مردن لەوەر گەرمی خوەر

گۆڤار تایم باس ئەوە کرد کە توێژینەوەگە دویای تاوسانیگ تیەێد کە پلەی گەرمی بەرز و شەپوول گەرما لە ئەمەریکا دروس بویە.

 توێژینەوەگە کە دویەکە دووشەممە لە گۆڤار کۆمەڵەی پزیشکی ئەمریکی بڵاو کریا، دەرخست کە شمارەی ئەو کەسەیلە لەوەر گەرمی گیانیان لەدەسدانە ساڵانە لە 1069 کەسەو لە ساڵ 1999 تا 2325 کەس لە ساڵ 2023 بازدان وەخوەی دیە.

 وە گشتی لە ماوەی ئەو ٢٤ ساڵە لە ئەمریکا ٢١ هەزار و ٥١٨ مردن لەوەر گەرماوە بویە.

 تەنیا لە ماوەی هەفت ساڵ گوزەشتە، توێژەرەیل زیایبوین وەرچەو مردن لەوەر گەرمی پەیا کردنە، کە هاووختە وەرد بەرزەوبوین پلەی گەرمی توومار کریاس.

 توێژەرەیل زانیارییەیل سەنتەری کۆنترۆڵکردن و مقیەتبوین لە بیمارەیل ئەمریکا شیەو کردنە لەبان گشت ئەو مردنەیلە لەوەر گەرمی توومار کریانە کە لە ساڵ ١٩٩٩ تا ٢٠٢٣ لە وڵاتەگە توومار کریاس.

شمارەی مردگەیل ساڵ وە ساڵ ئاڵشت بووکر بەڵام توێژەرەیل ئەرایان دەرکەفت کە مردن لەوەر گەرمی ساڵانە لە ساڵ ٢٠١٦ تا ٢٠٢٣ وە ریژەی ١٦.٨% زیای کردگە.

 توێژەرەیل لە شیکارییەیل ئویشن: وەگەرد وەردەوامی بەرزەوبوین پلەی گەرمی لەوەر ئاڵشتبوین کەشوهەوا، هاتێ ئی مردنەیلە وەردەوام بەرزەو بوون.

وەگورەی ئامارەیل ئیدارەی نیشتمانی ئۆقیانووس و بەرگەهەوای ئەمریکا، مانگ تەمموز ئمساڵ گەرمترین مانگ بوی لە جهان کە لە ماوەی 175 ساڵ توومار کریاس، و ساڵ ٢٠٢٣ گەرمترین ساڵ بوی.