شمارەیان 242 کەسە.. گشت سەرنشینەیل فرۆکە هیندیەگە گیان لە دەسدان
شەفەق نیوز/ رووژنامەی ئیندیان ئێکسپرێس وە پشت بەسانن وە پۆلیس هیندیستان راگەیان، گشت سەرنشینەیل فرۆکەی کڕ ئاسمانی هیندستان کە ئمڕوو پەنجشەممە لە ئەحمەد ئاباد وەخوارکەفت گیان لەدەسدانە و شمارەیان 242 کەسە، وەپای رۆیتەرز.
کۆمیسار پۆلیس شارەگە جی ئێس. مالیک وت؛ وەپی چێد کەس لە رویداوەگە قورتاری نەویە، وەپای ئەوەگ فرۆکەگە لە ناوچەیگ نیشتەجیبوین وەخوارکەفتیە کە شمارەیگ نویسینگە گرێدە خوەی هاتێ شمارەی قوربانیەیل زیاتر بوود"، هویچ هویردەکاریگ لەباوەت قوربانیەیل بان زەوی نەدریایە، وەپای فرانس پرێس.
پۆلیس هیندیستان خەوەردا، ئمڕوو پەنجشەممە، زیاتر لە 100 تەرم ئەرا خەستەخانەی ئەحمەد ئاباد بریاس لەدویای شکیان فرۆکەی سەر وە کڕ ئاسمانی هیندستان.
وتیش، کراکارەیل شمارەی فرەیگ لە کەسەیلیگ ئاخڵەبوی ناو بینایەیل قورتارکردن، وەپای رۆیتەرز.
لای خوەیشەو، کڕ هیندستان راگەیان 169 هیندی و دوو هاوڵاتی بەریتانی و پورتوگالی و کەنەدیگ لەناوەین 242 کەسە سەرنشینەگەی ئەو فرۆکە تێکشکیاگەی ئمڕوو پەنجشەممەی ئەحمەد ئاباد بوی.
کۆمپانیای وەڕێەبەر گەشتەگەوت؛ فرۆکەگە لە جویر بوینغ
787-8 بوی 242 کەس هەڵگردبوی لە سەرنشین و ئەندامەیل دەسەگە، لەناویان 230 کەس سەرنشینەگە 169 هیندی و53 بەریتانی و یەک کەنەدی و هەفت پورتوگالی بوین"، وەپای فرانس پرێس.
